نايف معلا والشيخ سلمان العوده

[محمد ابن رووق]

يـا شيخنـا سلمـان والتغييـر مفتـاح الكمـال
والآدمي مجبول في الدنيـا علـى حـب الجديـد

لكن في ظل الظـروف الراهنـة يبقـى السـؤال
وش قيمة التغيير لا صرنا بنوك بـلا رصيـد ؟!

نقول مـا لا نفعـل ونفعـل بعـد مـا لا يقـال
ونوعـد ونخلـف ونتعـذر دايـم بعـذر البليـد

عقود من عمر الزمـن مـرَّت وحنـا لا نـزال
نبكي على أطلال النصر ورسوم ماضينا المجيـد

من كثر ما نحكي عن الماضي ونسرف في الجدال
ما نعرف لبغداد حاكـم غيـر هـارون الرشيـد

ومن كثر ما نغفل عن الواقـع ونجفـل للخيـال
صرنا نوابغ فـي الخطابـة والمقالـة والقصيـد

يا كثرنا في القول والمنقول لو مـا لـه مجـال
ويا قلنا لا جا مجال الفعـل فـي اليـوم الشديـد

نقول ما للحمل غيـر الحمـل وظهـور الجمـال
وجمالنـا هـادت عزايمهـا وعيّـت لا تهـيـد

ولولا الجمال اللي بقت بحمولهـا تشيـل الثقـال
صارت عروبتنا مجرد رمز فـي طابـع بريـد

ستين عام القـدس تستجـدي بسـالات الرجـال
وحنـا نعشمهـا بحـلٍ سلمـي وعيـشٍ رغيـد

ستيـن عـامٍ وانقضـت والاحتـلال الاحتـلال
وحنا نحاول نجمع الأضداد فـي وجـه الضديـد

نعقد قمم ، نشحذ همـم والسالفـة روح وتعـال
نشجب ونستنكر ولا نـدري وش اللـي نستفيـد

وهناك في غـزة يغيـب البـدر ويهـل الهـلال
والطفل ما حصل غذا صالـح ولا حقنـة وريـد

وبغـداد مسـرح للفتـن والتصفيـة والاغتيـال
وش لون ما تختل والمحتـل لـه فيهـا عضيـد

متوارثين الضعف أباً عن جـد وإلا عـن خـوال
نزيـد لكـن مـع زيادتنـا مواجعـنـا تـزيـد

ويا قاري التاريـخ سامـراء مضـرب للمثـال
والله يستر لا تصير ( إسلام أباد ) إسلام أ ُبيـد !

يحق لك تسأل وأنا أجاوب علـى قـدر السـؤال
والأمـر لله والله يدبّـر بخلـقـه مــا يـريـد

إن كان تبغى تعرف اللـي يحكـم العالـم تعـال
( ارسم مثلث وأقلبه ، وارسم مثلث من جديـد )