مجاراة لمرثية الزميل ناصر بإبنته غلا

[نايف العبيد العتيبي]

إِنَّا لِلَّهِ وَإِنَّا إِلَيْهِ رَاجِعُونَ .

/

مجاراة وصدى صوت لقصيدة الشاعر والأخ العزيز
ناصر العواد العتيبي
ورثاء بإبنته غلأ التي توفت نهار عيد الاضحى إثر حادث مروري
جعلها الله شفيعتاً لوالديها يوم القيامه









هنا مرثية ناصر العواد في طفلته غَلا :

يقول اللي جرع مر الليالي=وجرحه من عميقات الجروح
نهار العيد ياعزي لحالي=علينا الحزن خيم مايروح
شربنا الماء كدر عقب الزلالي=ونار الحزن في قلبي تفوح
(غلأ)راحت وخلتني لحالي=ولو بالكيف والله ماتروح
حكاويها بنصاف الليالي=تزيل الهم وبلسم للجروح
الا ياروح روحي من غدى لي=الا يابعد من يبقى ويروح
خضعنا لحكم خلاق الجبالي=وعالم مابقلبي من جروح
الا ياحسرتي مما جرى لي=طلبت الرب عقلي لا يروح
وصلاه الله عدد حب الرمالي=على محمد عدد ورقى تنوح

وهُنا مجاراتي للأخ والصديق ناصر العواد العتيبي :

طفت بقعاء ودمع العين سالي = وخيل الحزن في صدري جموح
بكت ( برزه ) وصاحت بانفعالي = و( قاع الملح ) من حزنه يبوح
يصيح ( احْمام ) من جالٍ لجالي = و رد (اللويمي) ابصوتٍ بحوح
على فقد ( الغلا ) بنت الرجالي = تحرّى العيد في نشوه وروح
تحرّى العيد أيام وليالي = وبارق حتفها منها يلوح
تحنّت وامشطت ذيك الخصالي = وحنّت كفّها حِنّت طموح
أبوعواّد يدعيها تعالي = صغيرة سن مغناجٍ مزوح
صغيرة سن طفله ماتبالي = من الأحلام تبني له سروح !
توارت شمسها قبل الزوالي = تغطلس نورها بين السفوح
على خد القمر رملٍ يهالي = نهار العيد بين قشعٍ ودوح
أبوعواّد ياقرم العيالي = أبوعواّد يالوجه السموح
عسى الله ياجرك أول وتالي = وغيم الحزن عن قلبك يشوح

وعِندما وصلت قصيدتي للشاعر
ناصر العواد ارسل لي هذه القصيدة واللي يقول فيها :

يانايف الشعر ياصاخره ياساحره =ياشاعرٍ بالمواقف دايم لك حضور
يامرضيٍ للصديق وللعدو قاهره=يانايف أنته على ماقيل قمة حضور
ياأبن الحميدي فعولك للبشر ظاهره=بمشاركاتن صريحه مابها قول زور
يشكرك ناصر وبقعاء البدو و الحاضره=يشكرك قصرٍ تعلى فوق كل القصور
والله يسعدك في دنيا وبالأخره=ويوفقك وين ماوجهت تلقى سفور
فكري مشتت ومابي يالخوي خابره=والمعذره كان في شعري لقيتوا قصور
وصلاة ربي على سيد البشر بأخره=على محمد عدد خط القلم بالسطور

وهُنا جوابي :

لاهنت يامرسل القيفان ياناشره = يامن غمرني بطيبه والثناء والشكور
تسلم لنا ياعميد الشعر ياناصره = من تمدحه لاتلومه لويصيبه غرور
بعض الآوادم بيوته مثلكم ثايره = وبعض الآوادم يجيني من بيوته فتور
لو القوافي كواكب بالفضاء دايره = تبقى على راسك المطنوخ دايم تدور
يابن عمرو دام بقعاء جدكم شاعره = ماهي غريبة أجل لاصرت تنحت صخور !!
عسى لياليك دايم بالفرح عامره = ودنياك ياناصر العواد تبقى زهور
واختامها عد نجماتٍ بدت ظاهره = صلوا على اللي دعا للنور كل العصور

وسَلامتكم ...

[فايز بن سرحان الثبيتي]

ساحر الشعر نايف العبيد


هكذا انت دائما تواجدك مختلف وتفرض على متابعينك الوقوف باعجاب عند ابياتك وقصائدك "





صح لسانك على هذه اللفتة الانسانية الرائعه

وصح لسان الشاعر ناصر العواد العتيبي والله يعوضه خير ان شاء الله "

التوقيع

إذا شئت أن تحيا سليما من الأذى=وحظك موفور وعرضك صين لسانك لا تذكر به عورة امرىء=فكلك عورات وللناس السن وعينك إن أبدت إليك معايبا = فصنهاوقل يا عين للناس أعين وعاشر بمعروف وسامح من اعتدى=وفارق ولكن بالتى هى أحسن

[نايف العبيد العتيبي]

تسلم يابن سرحان والله لايهينك
مرورك اسعدني وشرفني

/


دُمت بود

[جمال العضياني]

ساحر الشعر نايف العبيد
مبدع الله لايضرك,,,,,,
وصح لسان الشاعر ناصر العواد العتيبي والله يعوضه خير ان شاء الله "

[الصويت الثبيتي العتيبي]

صح لسانك
وصح لسان الشاعر ناصر العواد العتيبي والله يعوضه خير ان شاء الله "