يقول اللي جرع مر الليالي=وجرحه من عميقات الجروح
نهار العيد ياعزي لحالي=علينا الحزن خيم مايروح
شربنا الماء كدر عقب الزلالي=ونار الحزن في قلبي تفوح
(غلأ)راحت وخلتني لحالي=ولو بالكيف والله ماتروح
حكاويها بنصاف الليالي=تزيل الهم وبلسم للجروح
الا ياروح روحي من غدى لي=الا يابعد من يبقى ويروح
خضعنا لحكم خلاق الجبالي=وعالم مابقلبي من جروح
الا ياحسرتي مما جرى لي=طلبت الرب عقلي لا يروح
وصلاه الله عدد حب الرمالي=على محمد عدد ورقى تنوح

طفت بقعاء ودمع العين سالي = وخيل الحزن في صدري جموح
بكت ( برزه ) وصاحت بانفعالي = و( قاع الملح ) من حزنه يبوح
يصيح ( احْمام ) من جالٍ لجالي = و رد (اللويمي) ابصوتٍ بحوح
على فقد ( الغلا ) بنت الرجالي = تحرّى العيد في نشوه وروح
تحرّى العيد أيام وليالي = وبارق حتفها منها يلوح
تحنّت وامشطت ذيك الخصالي = وحنّت كفّها حِنّت طموح
أبوعواّد يدعيها تعالي = صغيرة سن مغناجٍ مزوح
صغيرة سن طفله ماتبالي = من الأحلام تبني له سروح !
توارت شمسها قبل الزوالي = تغطلس نورها بين السفوح
على خد القمر رملٍ يهالي = نهار العيد بين قشعٍ ودوح
أبوعواّد ياقرم العيالي = أبوعواّد يالوجه السموح
عسى الله ياجرك أول وتالي = وغيم الحزن عن قلبك يشوح

يانايف الشعر ياصاخره ياساحره =ياشاعرٍ بالمواقف دايم لك حضور
يامرضيٍ للصديق وللعدو قاهره=يانايف أنته على ماقيل قمة حضور
ياأبن الحميدي فعولك للبشر ظاهره=بمشاركاتن صريحه مابها قول زور
يشكرك ناصر وبقعاء البدو و الحاضره=يشكرك قصرٍ تعلى فوق كل القصور
والله يسعدك في دنيا وبالأخره=ويوفقك وين ماوجهت تلقى سفور
فكري مشتت ومابي يالخوي خابره=والمعذره كان في شعري لقيتوا قصور
وصلاة ربي على سيد البشر بأخره=على محمد عدد خط القلم بالسطور

لاهنت يامرسل القيفان ياناشره = يامن غمرني بطيبه والثناء والشكور
تسلم لنا ياعميد الشعر ياناصره = من تمدحه لاتلومه لويصيبه غرور
بعض الآوادم بيوته مثلكم ثايره = وبعض الآوادم يجيني من بيوته فتور
لو القوافي كواكب بالفضاء دايره = تبقى على راسك المطنوخ دايم تدور
يابن عمرو دام بقعاء جدكم شاعره = ماهي غريبة أجل لاصرت تنحت صخور !!
عسى لياليك دايم بالفرح عامره = ودنياك ياناصر العواد تبقى زهور
واختامها عد نجماتٍ بدت ظاهره = صلوا على اللي دعا للنور كل العصور