زيزوم الثبيتي =
يامرحبا ترحيب ورد ونواوير =ويهدي على كل الشواعير باقه
ترحيب وافي مايجي فيه تقصير=يبعد عن أعلوم الهزال الدقاقه
سعد الوافي =
اهلا هلا ياطيب القلب والسير=منهج وفا والكل يعرف رواقه
لاشك وقعك يافتى الجود تبشير=تبشير من يظهر مع اسمه بطاقه
زيزوم الثبيتي =
يامرحبا ياصاحبي والغلا غير =يقولها اللي مايخون الصداقه
طير الكويت اليوم ماعاد هو طير =طير (ن) بلا جنحان جته الاعاقه
سعد الوافي =
السلم ترحيبٍ بليا معاذير=وانتا تحسب الناس تنسى الرفاقه
لكن مابشره على جاحد الخير=فسر كلامك لاتجيك الاعاقه
زيزوم الثبيتي =
السلم بين يازبون المناعير=واضح كما نور (ن) بحزة أشراقه
مير البلا لا قلت دق التعابير =ماترضي العالم وكل الرفاقه
سعد الوافي =
جزل الفرايد من صفا البال تسخير=والفكر لو هاضت عواليه طاقه
الحلو يطبع في سما الوجه تأثير=والمر ماشانت وصعبٍ مذاقه
زيزوم الثبيتي =
جزل الفرايد ياسعد مالها غير =حر(ن) طليق(ن) جاوب الوقت ساقه
ولا أنته أبن ثابت ولا الشاعر العير=شاعر عوج بين الشواعير عاقه
سعد الوافي =
دام المسامح يعطي الناس تحذير=وجهة نظر مابين جملٍ وناقه
وش عاقب المبنى ركيك التدابير=بعد المشيب وماعمته البراقه
| التوقيع |
اللي على كيفه يجي والاّ على كيفه يروح = إن راح في حفظ الولي وإن جاء هلا واهلآ هلا.
ماني على قربه شفي والاّ على بعده شفوح = الله خلقني مااعترض من صد من كل الملا.
|