لاضاق صدر الفتى ..
ارجوا أن تسمحوا لهذه المتواضعه بالإنحناء أمام ذائقتكم الرفيعه
لاضاق صدر الفتى من شيءٍ يحسّه = ولا ثار با الراس شيء و(دنّ) هاجوسه
الطرس تحت القلم لو ينلعن رسّه = مافاد حبر القلم لو ذابت طروسه
اشره على اللي يقيس النبض ويجسّه = بين المخاليق يمشي كنّه السوسه
فالسمن دايم يحط السمّ ويدسه = لاشاف له شيء راكد لازم يحوسه
يلعب مع الناس مثل الفار والبسّه = تضرس على (الغافله والغافل) ضروسه
ابليس فاشح علاه ودايم يوسّه = كنه على الناس يصرف باقي فلوسه
هذا وانا لو مسكت الحبل ابا امسّه = لين إنّي آطا على علباه وآدوسه
حتى انّي العن ثواه وينقطع حسّه = ونرتاح من عالمٍ عميا ومهووسه
الله يجازي ضعيف النفس ويخسّه = ويهدّ عالي بناه ويقلع غروسه
مانيب شارب هواء وافكاره تهسّه = شوفي بعيد المدى وإخطاي مدروسه
دايم ليا لاح برق ورحت ابا اعسّه = أذكر حدود الحيا .. واثبّت عسوسه