عبدالله الاصعر
الله على الايام وليالها السود=خلت حكيم العقل يزهق بروحه
يامعجب انت بقسم الاشراف موجود=على المريض اللي عطيبه جروحه
معجب العتيبي
لاتامن الدنيا ترا منت محدود= واخذ النصيحه من قلوبٍ نصوحه
في ماقفي ماجبت شرهه ومنقود=ما احتاج للي زايداتٍ مدوحه
عبدالله الاصعر
تلقى الكرم والجود مع راعي الجود=ماهوب عند اهل اليدين الشحوحه
لو درب بعض الناس مغلق ومسدود=يمدي بليد العقل صعب(ن) نجوحه
معجب العتيبي
الطيب بين الناس ماجاله حدود= وياطيب من يغني عن الناس روحه
لو الكفاح يصير منسي ومفقود=مابيّن الميزان معنى رجوحه
عبدالله الاصعر
احد(ن) تقولنه عن الطيب مردود=واحد(ن)يشيد بالمعزه صروحه
اللي يحسد الخير في عينه العود=والسيئات له تسجل بلوحه
معجب العتيبي
انشد عن اللي قلت سلطان وسعود=ترا البحر صافي وفيه الملوحه
حتى لو ان الفكر بالحيل مشدود= سرك ياراع السر لا لاتبوحه
عبدالله الاصعر
مانشد عن اللي صار ماعنه منشود=معاد باقي غير روحه وسوحه
الحوثي اللي جاحر(ن)في جبل دود=بيت بلا سيسان تسقط صطوحه
معجب العتيبي
قدم على ماقلت كلمات وشهود=حتى لو ان الوقت سوحه وروحه
هذاك ياعبدالله انسان مقرود=والا كتاب الله تسده شروحه
عبدالله الاصعر
ترى الخيال اللي به بروق ورعود=بعيد عنك الوبل وبعيد ضوحه
ياربعنا صاحين ولا انتم رقود=نفوسكم للدين ماهي طموحه
معجب العتيبي
اللي ليامنه رسم حطله زود=ماتضبط الرسمه على كل لوحه
الله يقدينا على الحق ونعود=لعل عبدالله يقول السموحه