[هلال العتيبي]

الورقة 27
في حفل تقاعد ثلاثة من الزملاء
هذا الأسبوع حثيتهم على الزواج
ولكن لاحياة لمن تنادي هههههههه

سلام الله والهاجس على بنّه طغى هيله=بدع زين البيوت وحافها واحسن قوافيها
يصب الكيف الاشقر من دلاله في فناجيله=يسوقه في يدين رجال تاخذها وتعطيها
سعد واقبال وابراهيم محور حفلنا الليله=لهم منّا الوفاء والطيب والازهار نهديها
تحيه صادقة يامنبع النور ومشاعيله=شموع(ن)تحترق لجل الدروب ومن مشى فيها
أكيد انتم مقابيس الدجى وانتم قناديله=معين(ن)مانضب يطوي بلاد الله ويسقيها
لكم درع الوفا والكل منكم مابخس كيله=يدير الشور والصعبه يعقّلها ويثنيها
أثرْكم//في رياض المعرفه فاحت مداهيله=وجيش العاديات النقع ثاير من مواطيها
وخط اقلامكم ميدان تصهل فالوغى خيله=نواياكم خيول الخير معقود بنواصيها
وفيتوا في عطاكم كل فارس حسب تحصيله=وشيّدّتوا حصون العلم وارسيتوا مبانيها
وانا اقول المعلم واجب(ن)مدحه وتبجيله=سواة الغيث يسقي جرهد البيداء ويحييها
ونبى نخرج عن الموضوع ونغيّر تفاصيله=هروج(ن)مانبى النايد من العربان يوحيها
يقولون التقاعد زين للي ماسكن حيله=يدوّر له برنسيسه تدفّيه ويدفّيها
اليا شفت الحبيب الاوّلي جفّت مناهيله=وقام يسفّط الافراح بالدّور ويطوّيها
علاك بقوم(تؤبرني) أو(اتْنيّل قتك نيله)=وهات الدّرّه اللي ماتخجّل وجه شاريها
تسوّي في حنايا الصدر تدويره وتحويله=تلمّع حلمك المهجور وايّامك تحليها
ومن ضاعت علومه ينتخي بأمّه وتدعيله=عسى ربه ييسرله اليا كثرت دعاويها
أمّا مسيار وإلاّ كهلته تعطف وتاويله=يتنّح عندها تقعد تفليه ويفلّيها
ومن فاته قطار العرس يالاصحاب عزّيله=يقرّط في عجوزه ويتجوّد في علابيها
يعذّر في جميع احلامه ويقْصب معاميله=وريعان الفشيله والنقد لاعاد يبديها
وانا خابر سعد في صدره هروج(ن)لها طيله=مرار يقولها ومرار يجْحدها ويخفيها
وابراهيم ابْلش أهل جياد وكدي بتهاويله=يسرّح كارثة والثانيه حالا يضوّيها
واقبال مسوّي المحجاه ومجهز درابيله=يطير الصيد وهو يرفع البندق ويرخيها
وانا اقول استريحوا خلّوا العرس لرجاجيله=سواة (مسّفر)اللي لن نواى حاجه يسوّيها
ابن حمدان ابن حمدان من ياصل مواصيله=يقول الثالثه لن دبّر الرحمن ناويها
وصلاة الله عدد مالاح بارق وانحدر سيْله=على من بلّغ الدعوة وصاغ اجمل معانيها