في مكان ٍ ( ما) ولا هو شرط تحديد المكانـي=المهم انه تحـت قبـة سمـا الخالـق ركونـه
والزمن نصفه زمن غيري ونصفه من زمانـي=فيـه مـن هـذا وذاك وحاولـوا تتخيلـونـه
فيه عالم هندسـة جينـات لا بحاثـه دعانـي=قلت له مانيب فاضي لك وطيـر لـي عيونـه
قلت له وش فيك؟ قال اشفيك ياخي ما تبانـي؟=دايم انتم يا عرب غير المعـرّب مـا تبونـه!!
ابتسمت وقلت كردي؟ قـال جـدي تركمانـي=قلت ما تفرق معي هي كلهـا نفـس النمونـه
قال طيب ممكن اناقش معك موضـوع ثانـي؟=قلت عجل واشرح الموضوع وابشر با المعونه
قال فا الجين الوراثي قلت اعرفه مـا خفانـي=قال لا في شي خافي يا عـرب مـا تعرفونـه
قلت هاته وانتظرتـه ساعـه وسبعـة ثوانـي=لين جاب ابحاثه اللـي حطهـا سـده ودونـه
قال: انا استنسخت لي عالم يشار لـه البنانـي=قلت منهو؟ قال اديب وكـل ابوكـم تخبرونـه
قلت وينه؟ قال عانه قلت مـا اشوفـه ترانـي=قال هذا قلت هـذا؟ قـال وش رايـك بلونـه؟
جاب لي مخلوق مـدري فـار والا مودمانـي=ماله الا عين وحده وان ضحك طاحت سنونـه
هو صحيح ان له راس وقلب ولسان واذانـي=مير لا عاينت له راسه غطس لا قصى متونـه
قلت يهرج؟ قال يهرج ما يبـي لـه ترجمانـي=قلت منهو؟ قال معقول العرب مـا يذكرونـه؟
يا عرب هـذا الاديـب الالمعـي الاصفهانـي=له كتاب تدرسونه فا الفصـول وتدرسونـه!!
صاحب النهج البليـغ مألـف كتـاب الاغانـي=فيه حرف اكبر دهاة النحو عجـزوا يعربونـه
قلت وشهو؟ قال ( لم) قلت ايه له عدة معانـي=حرف جزم ان مر له في فعل ما حرك سكونه
قال طيب والضمير المستتـر؟ قلـت بتوانـي=نستـره تكريـم وانتـم عيبكـم مـا تسترونـه
قال حرف العلة؟ وقلت العلـل كانـت ثمانـي=وانت تاسعها وعاشرها ( ابو قـرن وقرونـه)
قا ل حرف الجر؟ قلت الثور وحبال السوانـي=والهماج اللي ثـلاث اربـاع منكـم تشربونـه
قال اداة النصب؟ قلت النصب من قاصي وداني=طبع فيكم لو ترككم من عجـب مـا تتركونـه
قال نسال شيخنا الفاضـل وقلـت الله هدانـي=ما بقى الا شيـخ مـن جيناتكـم تستنسخونـه
دام انا زابن علـى القـران والسبـع المثانـي=انته ازبن صاحبك كـل وعينـه مـن زبونـه
وانتبه بكـره تقـول انـك نسخـت البيهقانـي=انت حيا الله ليا استنسخت لك كرتون تونـه!!