تفتح قميص الدرب خطوتها ترف وتـزرره=وانا افتح ازراري واسكرها على خطواتهـا
هي تفتح ازرار الطريـق بكيفهـا وتسكـره=وانا ابتلش با ازرار ثوبي واغلـط بفتحاتهـا
خطواتها غيمه على وجه الطريق المخضره=يا بخت الارض المخضره با الغيمه وزخاتها
الجادل اللي صمتها يخفي حديـث وثرثـره=كن السكوت اللي تجيده بعض مـن كلماتهـا
مرت ولا التفت مهو لا جل انهـا متكبـره=لكن تخاف نروح فيها مـن سبـب لفتاتهـا
فاخر عناقيد الطفوله واول غصـون المـره=فـاول انوثتهـا وطفلـه فاخـر نهاياتـهـا
جنه بربوه صابها وابـل وصـارت مثمـره=طابت واتت اكلهـا ضعفيـن فـي اوقاتهـا
من تينهـا تفاحاهـا يغتـاض ويفـج نحـره=وتغار شجرة تينهـا مـن غيـض تفاحاتهـا
مالت سنابلها الخضر واغرت عصافير الذره=لو كان ما عصفور اخذ له شي من حباتهـا
ان جيتها من ميمنه وان جيتها مـن ميسـره=كل الجهات الاربعه من وين رحت جهاتهـا
مملوحة ومن شاف قبلي ملح داخـل سكـره=الملـح فيهـا كلهـا والسـكـرة بشفاتـهـا
وقفتها اسالها ووقفـت والحـروف مبعثـره=المهـا وتطيـر واعـود والــم شتاتـهـا
وانسىسوالي واذكره وانساه وارجع واذكره=وان جيت اقوله لخبطت كل الحكي بسكاتهـا
واطول الحكي وتقاطعنـي دلـع وتقصـره=وانـا لعانـه ودي تطـول معـي وقفاتهـا
قالت صحيح انك ملكـع واسئلتـك مكـرره=سويتها قصة بنـو اسرائيـل فـي توارتهـا
الله امرهـم يذبحـون بـدون تحديـد بقـره=لكن تمادوا وسئلـوا عـن لونهـا وصفاتهـا
قلت ايه لكن بعدها نالـوا عظيـم المغفـره=وانا :ما نلت الا رمـاح عيونـك وطعناتهـا
قالت بنظرة وابتسامـه يـا لئيـم المعـذره=هات ورقتك اللي معك في يدك يا الله هاتها!!