سعود البرقاوي
يابن فلاح اقرب لعلك ماتهون = وانهض على ساقك وخلك مستعد
كان الاصابة وقعّت بين العيون = هذا هو المطلوب مني ياولد
علي فلاح العضياني
سيفي يقصّ الرّوس من بين المتون =إليا تواجهنا على حسب الوعد
يا سعود لا تنفخ و شاربك محسون=بالموس عصر السبت في ليل الاحد
سعود البرقاوي
يا اصحابنا لاعاد معنا تضحكون = وانتم على ماقيل ما فالحمض آحد
تقصر يمينك وانت قلي من تكون = خذها على الحجان والباقي بعد
علي فلاح العضياني
وش لون تضحك و انت ما عندك سنون=ياللي مع الشعار تكميلة عدد
انا علي للماقف الطيّب زبون=حظّي من الطاله كما حظّ الاسد
سعود البرقاوي
ترى الجماعة كل ابيهم يشهدون = انك لاحل اللازم ضعيّف جهد
تفخر بنفسك ياعلي وانته بدون = عقل وفكر والمختفي اعظم وأشد
علي فلاح العضياني
و الله لتبطي ما تخلّص فالديون=ياللي تهدّد و أنت واقف ترتعد !!!
أفخر بنفسي و انت معنا ماش لون !!!=ما غير مثل التكسي اللي فالبلد !!!
سعود البرقاوي
لو تستر العورة ظهر سبعة عيون = وحده من السبعه لعب فيها الرمد
ياروق انا اعرف من صحيبي وش تبون = لكن سلك درب القرادة وانقرد
علي فلاح العضياني
ليتك على حسب الهقاوي و الظنون=صاحبك للجزله وكيلٍ معتمد
ما انته خصيمي لو تغنّي باللحون= خصمي مثل سلطان و الروقي رعد
سعود البرقاوي
تسحب ذيول الشر وتروح مغبون = ماعاد عندك لاثبوت ولاسند
خلك مع اصحابك قبل لايزعلون = دور رضاهم بأي حاجة واجتهد
علي فلاح العضياني
خضّبت سيفى فيك من كثر الطعون=مال الجنازه غير تدفن باللحد
شرواي في وقت المواقف يعرفون=يوم انت ما يمّك نظر يا بو فهد
سعود البرقاوي
سيفك موظف للذبايح فالصحون = ماهو من سيوفٍ تقد العظم قد
شرواك لامنا هرجنا يصمتون = واليا وقفنا ساعة الشدة قعد
علي فلاح العضياني
حنا عليك نقول و نطول و نمون=العام و اليوم و غداً و إليا الابد
شرواكم يقولون ما لا يفعلون=إليا احتمت شمس الضحى دمّك برد
سعود البرقاوي
ليتك تغني فسطوانة نجد فون = خل القصايد عند رجالٍ قصد
يابن فلاح انت سواة الحيزبون = تمد للاجواد حبلٍ من مسد