عقاب العنزي
ياحاكم انته علومك ماتسر الصديق = احسب من اليوم انا وانته ترانا اخصما
صاحبك شلته بعد ماطاح وسط المضيق = وانته ليا طحت شالك فوق حد السما
حاكم الغنامي
ياعقاب قلته وانا باقول لا مايليق=انا خصيمي لسانه ماينوش الجما
كانك نسيته تراه العام اخوك الشقيق=الّحق ضعونه قبل يطبق عليك الضما
عقاب العنزي
انته تحب إلك نادي مير تكره فريق = وان كان ماشفتنا قلنا يامال العما
نيرانكم خلّفت وسط المدينه حريق = ضاعت حقوق الآوادم ياحماة الحما
حاكم الغنامي
فآخر زمن معدن القصدير جاله بريق =مير الذهب نعرفه غالي وله منجما
ياعقاب دامك عقاب اكفخ وعانق طويق =روس النوايف تشيل الغيم كانه زما
عقاب العنزي
المشكله من وضع له عز ومجد ٍ عريق = آخر زمن تنقد العرّاف ناس اغشما
العلم الاول ماشفنا له ياحاكم طريق = اعيونكم تلتفت واعروقكم بالدما
حاكم الغنامي
بينك وبين الغشامه فيه حبلٍ وثيق =ملزمبك الحبل وانته بالحبل ملزما
ماحدٍ يعيش الحياه بلا زفير وشهيق =وانته تمر الحياه وكن مالك فما
عقاب العنزي
الحبل لك ولا ّ انا حر ٍ وغايش طليق = ياراعي النيه اللي من سنين دهما
اثرك ياصاحبي ممّا حصل مستضيق = بكرا الليالي تبين اللي عليك انكما
حاكم الغنامي
اصهل صهيل الحصان وخل عنك النهيق =تبت يدينك على منطوقك المظلما
اعقاب يهرج وحبه في رحانا دقيق=لاشفته اذكر علوم اصحابه اهل ضرما