حاكم الغنامي
البقا لله مات الشاعر البرقاوي =بعد ماقامت ترفرف فالجبال اعلامه
كان شاعر ...بس عايش في حياته غاوي =واسمحولي بدفنه دفن الكريم اكرامه!
سعود البرقاوي
والله الا جاك نجمّ فوق راسك هاوي=شوف لك طرقة جديدة لاتجي قدامه
آخر الايام عاش دغيم الظلماوي=واعذروني ياجماعة لو تقوم قيامه
حاكم الغنامي
الحديث اللي تقوله مارواه الراوي =ابلع الموت وتجرع عبرته وسهامه
اخر الايام لو تدري وشنّي ناوي =والله انك ماتشره فالجمل وخطامه
سعود البرقاوي
راعي الزلفي نعرفه ياعرب زلفاوي =مير حاكم مانعرفه لا اختلف هندامه
لو افكر واتمعن في نوايا الشاوي = صرت مثل السلعة اللي في يد السوامة
حاكم الغنامي
راعي الثقبه نعرفه ياعرب شرقاوي =لايكذب واقعه لو عاش وسط احلامه
يانجوم المنتحب ردو على هوساوي =قبل حاكم لايحزّم للرجال حزامه
سعود البرقاوي
البحر ماينشرب والضلع ذيبه عاوي=واكثر العربان صار يعيش في دوامه
مادريت انك عضو في فرقة البرماوي=ياجماعة عاينوا لون اصبعه وابهامه
حاكم الغنامي
النداوي لارثع في صيدته ماياوي =والجمل لامن هدر قام ايّخبط باقدامه
كنت احسبنك طبيبٍ للجروح يداوي =واثرك اللي من جروحه ماتقوم عظامه
سعود البرقاوي
شجعوك الربع لين اونست مني لاوي=واختلفت وصرت موتر ملتوي صدامه
لاتحولها عليّه يوم بطنك خاوي=الدلامه خابرينه مثل ابوه دلامه
حاكم الغنامي
مشكله ماتعرف انك طايحٍ متساوي؟ =ماتحزمنا عشانك فاللقا بعمامه
انت مثل الفتوه اللي قالها طنطاوي =من تبعها غيرت قوميته واسلامه
سعود البرقاوي
في طريقك لاتجيني بالمشاكل ضاوي=يالعتيبي كلها من نفسك اللوامه
الصحافة ماتواخذ كامل الشنّاوي=والحقوق مزوره فمسلسله وافلامه