سلطان الجـذع
سلام تسليم يبطي حي من برقا أليا روق
يبداء عليه الجدل في كل ليل وينتهي به !!
ناويك ياصاحبي علي العضياني بطـاروق
قبل مشيبه يطلع في رموشك كم شيبه !!
علي فلاح العضياني
يامرحبا رحب فيه خيال واله رعود وبروق
واهل الجزيرة يخيلونه على ديـرة عتيبـة
تقولها يوم قلبك من لهيب الهـم محـروق
في كل طاروق وانته من مصيبة في مصيبة
سلطان الجـذع
انا على الذكريات الاوله حادينـي الشـوق
وادعي واقول العضياني متى حظي يجيبه !!
لو بعد حينٍ من الدنيا يجيك الطاق مطبوق
(رد البرى) عادةٍ من يمنا ماهي غريبة !!
علي فلاح العضياني
دايم ليا جاء التحدي يالجذع مالك معي سوق
قدام مرمى السهوم تصير للرامـي ضريبـة
يالشاعر اللي عليك انزل تعالى نجم من فوق
من حظ سلطان مدري صار من ردوة نصيبة
سلطان الجـذع
دقايق الله يبارك فيك واروقـك واتـروق
هل تعلم أني على الشعار شرٍ يندعي بـه
يانجمنا اللي مثل نجم المحاني مابك فروق
فالليل ماني بلاقي منك نورٍ ينسـري بـه
علي فلاح العضياني
لو جا معك يالجذع عشرين شاعر سقتكم سوق
انصاب عمهوج في كفـي واسلـه واعتزيبـه
لا والله فروق واجد بين صقر وبيـن غرنـوق
والورد لاهب ذعـذاع النسيـم يفـوح طيبـه
سلطان الجـذع
العام لاجيت لك من عبـرةٍ فالحلـق مخنـوق
واليوم ماشاء الله ألك لسان وتعرف تحكي به !!
لا لا ( سوا فالهواء ) ياعلي والمطرود ملحوق
والله لتقبل نصيبـك بالرضـا والا الغصيبـة !!
علي فلاح العضياني
فالماضي اتعلق العاني على بندر ومرزوق
واليوم الك شرهة ياصاحبي ماهي قريبـه
لولاي والله ماتسلم من عيون الغدر والبوق
ياربعنا اهـل الذهيبـه لاتفكـون الذهيبـه
سلطان الجـذع
مهما غدى لك ورى روس الرجال حقوق وحقوق
الكـذب ياصاحبـي مايستـر اثـار الغليبـة !!
ان كان فكيت نفسك ياعلي تسلـم مـن العـوق
لكن انا شايفٍ لي فيـك شـك وفيـك ريبـه !!
علي فلاح العضياني
بين المصادر لسانك مصدرِه ماهوب موثـوق
والصدق عندي وانا راعيه يوم الكذب خيبـه
الجوهره تنحفظ طول الزمن في جوف صندوق
اسمع نصيحة صحيبٍ مايفرط فـي صحيبـه
صح لسانك ياالأسطورة وصح لسانك ياراعي عمهوج
| التوقيع |
قال أبوبكر الصديق - رضي الله عنه - ( الموت أهون مما بعده، و أشدّ مما قبله )
حسبي الله ونعم الوكيل
كتبت وقد أيقنت يوم كتابتي .. بأن يدي تفنى ويبقى كتابها
فإن كتبت خيراً ستجزى بمثله .. وإن كتبت شرا عليها حسابها |