سلطان الجـذع
سلام تسليم يبطي حي من برقا أليا روق = يبداء عليه الجدل في كل ليل وينتهي به !!
ناويك ياصاحبي علي العضياني بطاروق = قبل مشيبه يطلع في رموشك كم شيبه !!
علي فلاح العضياني
يامرحبا رحب فيه خيال واله رعود وبروق = واهل الجزيرة يخيلونه على ديرة عتيبة
تقولها يوم قلبك من لهيب الهم محروق = في كل طاروق وانته من مصيبة في مصيبة
سلطان الجـذع
انا على الذكريات الاوله حاديني الشوق = وادعي واقول العضياني متى حظي يجيبه !!
لو بعد حينٍ من الدنيا يجيك الطاق مطبوق = (رد البرى) عادةٍ من يمنا ماهي غريبة !!
علي فلاح العضياني
دايم ليا جاء التحدي يالجذع مالك معي سوق = قدام مرمى السهوم تصير للرامي ضريبة
يالشاعر اللي عليك انزل تعالى نجم من فوق = من حظ سلطان مدري صار من ردوة نصيبة
سلطان الجـذع
دقايق الله يبارك فيك واروقك واتروق = هل تعلم أني على الشعار شرٍ يندعي به
يانجمنا اللي مثل نجم المحاني مابك فروق = فالليل ماني بلاقي منك نورٍ ينسري به
علي فلاح العضياني
لو جا معك يالجذع عشرين شاعر سقتكم سوق =انصاب عمهوج في كفي واسله واعتزيبه
لا والله فروق واجد بين صقر وبين غرنوق =والورد لاهب ذعذاع النسيم يفوح طيبه
سلطان الجـذع
العام لاجيت لك من عبرةٍ فالحلق مخنوق = واليوم ماشاء الله ألك لسان وتعرف تحكي به !!
لا لا ( سوا فالهواء ) ياعلي والمطرود ملحوق = والله لتقبل نصيبك بالرضا والا الغصيبة !!
علي فلاح العضياني
فالماضي اتعلق العاني على بندر ومرزوق =واليوم الك شرهة ياصاحبي ماهي قريبه
لولاي والله ماتسلم من عيون الغدر والبوق =ياربعنا اهل الذهيبه لاتفكون الذهيبه
سلطان الجـذع
مهما غدى لك ورى روس الرجال حقوق وحقوق = الكذب ياصاحبي مايستر اثار الغليبة !!
ان كان فكيت نفسك ياعلي تسلم من العوق = لكن انا شايفٍ لي فيك شك وفيك ريبه !!
علي فلاح العضياني
بين المصادر لسانك مصدرِه ماهوب موثوق =والصدق عندي وانا راعيه يوم الكذب خيبه
الجوهره تنحفظ طول الزمن في جوف صندوق=اسمع نصيحة صحيبٍ مايفرط في صحيبه