المحاورة جرت بين الشاعر العملاق صياف بن عواد الحربي رحمه الله و شليويح بن شلاح المطيري عام 1404هـ في بلدة العمار بمنطقة القصيم
صياف رحمه الله
شليويح المطيري شرب من شربة الذيب = وسافر في طريقه وخلاني لحالي
طوى حبل السواني على عرج العراقيب = ولا أدري متجه لليمن والا شمالي
شليويح
أنا ماني بصيده لعكفان المخاليب = اعرفك يالشهر قبل لايبدي الهلالي
زمان العام شفناك كفيت المحاليب = كرامه لابو عنتر.. وابو زيد الهلالي
صياف رحمه الله
طلعت من اسفل الضلع في روس المراقيب = وحول بك نصيبك على مرقاب خالي
أنا صفيــــــــــتها يوم خبثن المشاريب = لكن انته تـــــــــطش العمامه والعقالي
شليويح
اساير بعض الامه مابين الخبث والطيب = لكن أنته مع العدل يوم العدل مالي
يأكثر اصحابنا يوم جربت الاصاحيب = لكن الساس مبني على الجرف الهيالي
صياف رحمه الله
هبوبٍ شالت البيت مركوز الاطانيب = بعد كره تشيل الدقاق مع الجلالي
وصلت البحر الاحمر.. وحنيت المشاعيب = وبكره يصفي الماء لرعيان الحلالي
شليويح
أنا حقي على اللي يعرفون المواجيب = ولا يعرف لزوم الرجال الا الرجالي
شربنا الجم الازرق وخلانا المغاريب = وأنا ماضاع لي صرف قرش ولاريالي
صياف رحمه الله
ركبنا بالسفينه وسوينا تجاريب = سحابٍ طاح ماله لابرق ولا خيالي
وباكثر المشاكل.. وياكثر العذاريب = ولن ذقناك ياشري مر والاانت حالي