السلام عليكم ورحمة الله وبركاته
محاوره جرت بيني وبين الشاعر عبدالعزيز العازمي في أمّ الدووم
علي فلاح العضياني
سلام من شاعر يسلّم بيمناه= والطيّب إتصافح يميني يمينه
لاحت بروق الصيف ثم انتثر ماه=تباشري به يالعيون الحزينه
عبدالعزيز العازمي
يا مرحبا باللي سلامه سمعناه= سلام وجهه عنه تكفي يدينه
ياللي تخيل النوّ من حين منشاه= ترى الجبال السود بينك و بينه
علي العضياني
كلامي اللي جاك تدري بمعناه= واللي يدلّ الدرب ينظر بعينه
اللي يعرف كتاب ربّه و يقراه= ما فيه مانع لو يزور المدينه
عبد العزيز العازمي
أحسن تقول الشكر و الحمدلله=الشك زايل و العلاقه متينه
ما ننشد الرجال كم فرض صلاّه= إليا لقينا سجدته في جبينه
علي العضياني
الطيّب اللي ساعة الضيق نلقاه=يالله يا ربي تطوّل سنينه
اللي حصل له علم ما عاد ينساه= الله على بعض الدعاوي يعينه
عبدالعزيز العازمي
حول السفينه ناس واجد مزكّاه= و العلم عند اللي يقود السفينه
خلّه يروّح روحة مقيط و رشاه=و اللي يجينا يا علي حاسبينه
علي العضياني
يا كثر ما يطري على البال كثراه= لكنّ حاول تلتزم بالسكينه
ابليس في يوم النّحَر جاه ما جاه= و المسلم يطبّق تعاليم دينه
عبدالعزيز العازمي
علي غرس وسط المحاني وداياه=و الصيف كلّه راح و التمر وينه ؟
ابليس بعض أصحابنا من مطاياه=ملعون يلعبّ بالقلوب اللعينه
علي العضياني
الطيب فقلوب النشاما زرعناه = عساه يثمر عند وقته و حينه
بعض الرجال يشيل عقله بمخباه=و الله يبارك فالعقول الرزينه
عبد العزيز العازمي
ترى البخيل ان ما خدم ما خدمناه= سلمته المفتاح حق الخزينه
و سلامتكم
| التوقيع |
|
(( رأس الحكمه مخافة الله )) |