عقاااب العنزي=
هلا يامرحبا ترحيبة ٍ تنعش رصيـد السـوق=بعد جيت ولقيت حمود ياهل العـرف قدامـي
والا ياحمود من شهرين ودي معك في طاروق=لكن عيت تجمعّنـا الليـال وبيـض الايامـي
حمود بن برجس =
يدوم الك البقا في حلتي يالشاعـر المرمـوق=وانا اعدك من اهل الدار واهل الموقف الحامي
حرام ان السوالف مع رجال ٍ تحسن المنطوق=تشرفني .. ولكن للزمان ظـروف واحكامـي
عقاااب العنزي=
انا ماجهلـك لكـن تجهلـك ياحمـود برقـا وروق=هذا وانته رجـل لـك كلمتـك فالديـن الاسلامـي
هذا حظك كما ( سوار الذهب ) مايعتلي فـي فـوق=لكن وش يقنع اهل البشت واهل المنصب السامي !!
حمود بن برجس =
انا من فضل ربي مالبست المشلح المشقوق=تقلّدت السواري والفشق مليان في حزامـي
يابن وايل ترى ماضاع لي بين الرجال حقوق=ولاني في الزمان ودورته جايع ولا ضامـي
عقاااب العنزي=
تلوح ابروق من خلفك ومن قدمك تلوح ابروق=وانا ماعندي اعلاج ٍ يشافي جرحـك الدامـي
انا ماحرص على اللي مافرق بالشيح والرقروق=وابن برجس علم مجحود من مجموع الاعلامي
حمود بن برجس =
ولا يا لابسين التاج مدري لابسين الطوق=انا نفسي عزيزه ماتدانـي ورث الايتامـي
تقوله مار اقول الله يبارك في هل الصندوق=بعد كالوا لكم يا اهل الذهب بالكيلو جرامي
عقاااب العنزي=
انا قدمت له بني لكـن بنـي رجـع محـروق=من اسباب الغشيم اللي جهل في لبس الإحرامي
يكيلون العرب بجرام لجل يصير فيـه فـروق=آخير مـن الـذي ماعطـوه لارز ٍ ولايدامـي
حمود بن برجس =
انا والله ما اذم الشجره ام فروع وام عـروق=وسدي مايبيح ان رحت للمشـرق وللشامـي
يبين الفرق في الميدان والسابق من المسبوق=ليا جـا للمواجـه ساعـة ميدانهـا حامـي
عقاااب العنزي=
تجي كل يوم تسبرنا وحنا نبيع وسط السوق=وبضايعك العزيزه ماتشاف الا ورا العامـي
تقوله مير حبلك يابن برجس ماهو بموثوق=بحثت اسمك لكني مالقيته بيـن الآسامـي
حمود بن برجس =
اجي والقى حراج وهوشه ودوشه ولزم حلوق=وانا ماجيت ابا ابسط بين مسترزق وسوامي
نشدت العارفه ولا نشدت الجاهل المطفوق ؟=نظرك لـفوق ولا في مواطي جـرة اقدامـي
عقاااب العنزي=
بعد بكره تروق النـاس وانتـه يالعميـل تـروق=ونشوف الصحف وش خطت عليها بعض الاقلامي !
نشدت العقل والمنطـق قبـل لا آنشـد المنطـوق=وآنا ابديت وجـه الحـق ولانـي بعدهـا كامـي
ياسلام على اللعب الكااايف
صحت السنتكم
طارووق خمس نجوووم
| التوقيع |
اللي على كيفه يجي والاّ على كيفه يروح = إن راح في حفظ الولي وإن جاء هلا واهلآ هلا.
ماني على قربه شفي والاّ على بعده شفوح = الله خلقني مااعترض من صد من كل الملا.
|