باروود
مشرفنا معجب ليامنا لعبنا معاه = منه استفدنا واخذنا بالمعاني دروس
من ندرة الماس صاير غالي مشتراه = وبو ريالين حمّل منه بردا الفلوس
معجب العتيبي
حيالله الشاعر اللي عاليٍ مستواه=في ساحةٍ راقيه تزعل ضعوف النفوس
راع الذهب مايدوّر غيره ليا لقاه=لاتتعبون القدم يا اصحابنا والعسوس
باروود
ياراعي العرف راع الحلم يسعد نباه = الله ولامدةٍ من كف رجلٍ عبوس
عندي خبر كل قدرٍ ماله الاّ غطاه = بس الضروب استهدّه بعبعان التيوس
معجب العتيبي
الرجل يتعب على المطلوب لامن بغاه=ويشب لجله حروبٍ مثل حرب البسوس
والادمي ماله الا مقصده لا نواه=والاُسد ماهمها فالارض كثر البسوس
باروود
اراجع البنك ولقا كل رجل وعصاه = بنوه للصرف لكن صار مقلع ضروس
ذات الحسِن تحتضر باخر رمق فالحياه = حتيش لو نقشّت حنّا يدين العروس
معجب العتيبي
مافيه مالٍ بلا حراس ياللي تباه=لكنّ شد الحزام وللصواديف دوس
حياتها طيبه والقلب عندي دواه=لو تشتكي ياوسيع العرف بعض الحسوس