هذه القصيده اضعها بين ايديكم آمل ان تحوز على اعجابكم ...
راكـب اللي صمموه اهل الربا والعينه = اليهــود اللي من أولهـا على تاليها
شغـلهـم شغل رهيب وربهم ناســينه = ملتهـــين بحـب دنياً خاسـرٍ بانيهــا
رنج قاصرةٍ ضعيف الدخل عنه ايدينه = لو أهله تصـابح العدوان وتماسيها
لانطحـــته كـنك تحق السطر في عينه = وإن قفـيته مثل حرٍ صيدته ناويهـا
لونه أبيض وإن قربته معطي لونيــنه = مثل شاهي مع حليب مقلل شاهيها
والمراتب مثل كرسي خادم البيتــــينه = من ركب فيها يقول الناس متعليها
صانعه لو كان مسلم قلت ينصـر دينـه =مير كافر والحقيقه صنعته حاسيها
يوم يمشي قدم وضحٍ بالوصايف زينه = كن فيه من الوصايف مثل ماهو فيها
خص في وقت النبات اللي على أول حينه= وقفته وان ثمنت تصعب على شاريها
وان مشأ قدم الطـــياح يزينها وتزينه =مع روايع زينـــها قـدامها حالـيهــا
البل البل دونها الطــيب تطــول يمينه =والردي تصعب على شـرواه لو يبغيها
لاتقـــافت كن راعيها مخـلّـص ديـــنه =لو ديونه محصي الارقام مايحصيها
طفح وإبها من الأحدب صفات وعينه = باللحي وخشومها والموت في باقيها
اسنمتها فاهـــقه وارقـابـها مـــترينه = ولونها أرقاب المزون ان جيت ابا أحليها
والحقيقه زينها يصعب على محصينه =مير مأحلا جلستن قـــدامها نحـييها
ماحلا قدم العمر تطوى حلاة سنيــنه =جلسةٍ في روضٍ أخضر والمطر مسقيها
مع رجال مابهم عيٍّ خــبيث ضغــينه =ايتظاهر بالمــوده والعــرب موذيها
مع رجال كلبوهم بالوفاء من طـــينه =حي هـاك الربعه اللي ربها هاديهــا
جعل يفـــداهم رديٍّ ما يـكب الشــينه =شيـنته دايم تبين وحسنته مخفيهــا
بين ذاك وذاك دايم محفـين رجلينــه = ينقل هروج الردى للناس ويوديهــا
والحياه أيام وابن آدم على تكويـــنه =والحضيض اللي على وضح النقا بانيـها