[وصل العطياني؟؟؟]

السلام علاكم


هذي قصيدتي في حفلة السوطة :

يقول الشاعر اللي ما دخل كليّة الآداب=عطاه الله ومن يعطيه ما يحتاج كلّيــّة
ولا ودّه بموقف يحرج الأستاذ والطّلاب=ولو جاهم عطا مدرّسهم دروسٍ خصوصيّة
كثير الناس يمكن يحسبون الشعر بالمشعاب=وبعض الناس يحسب كلّ شاعر معه جنـّيّة
لكنّ الشعر فنٍ معتبر يحسب له ألف حساب=و لا هو من قريّب هات وزن وهات قافيّة
يبا له شاعرٍ لن جاب قالوا نشهد إنه جاب=بيوته يحتسيها كل راوي للفاويّة
وأنا شاعر و أعزّ أشناب بأبياتي وأذلّ أشناب=أخذت الشعر ورث وموهبة ماهو بـ عاريّة
على كبد الخوي سمن وعلى كبد العدو منساب=اقوله من ثقة والعود فـ عيون الحسوديّة
قصيدي ما يجيني غير عند الماقف الغصاب=بعكس اللي ليا هبّ البراد ومالت الفيّة
أهوجس واتنـقـّى من هواجيسي ما لذّ وطاب=وأسوق المدح للي يستحقّونه شهاميّة
حرام إن كان ما امدحكم بمدحٍ يلفت الألباب=لأعدّ إني من الأموات واكتب فيّ مرثيّة
يا اهل فعلٍ تردّدْه الرواه ويفحم الكتـّاب=وأهل هيبة تردّ المعتدي لا رحم أبو حيـّه
وأهل كلمة وأهل حكمة ورأيٍ يطلق الأنشاب=وأهل نخوة وأهل سطوة وأهل بندق وجنبيـّة
ليا مرّ إسمكم للخصم دمّه في عروقه راب=هذا ماهو ليا ثار الغبار وقامت الهيّة
وأهل يا مرحبا للضيف قبل انه يدقّ الباب=وأهل مبدأ وأهل كرمة وأهل فنجال بريّة
وأهل جاهٍ بفكّ أرقاب وسيوفٍ تقصّ أرقاب=من أوصاف الفخر وش عاد تبغى بعد هذيّة
ليا دارت بك صروف الزمن وأنشدّت الأعصاب=تزبّن لك سواط وترجع وعازتك مقضيّة
بدون مجاملة يا ما لكم عندي من الإعجاب=وأنا مانيب راعي كلمةٍ ماهيب محميّة
يشيب القاف يا آلاد السواط ومجدكم ما شاب=ما دام الروس تقدح بالظفر ودميّكم حيّة
وما دام إنكم عتبان لا داعي للإستغراب=هذا الواقع بدون قصور في شعب السعوديّة
عتيبة يوم كلٍ يفتخر بالفعل والأنساب=كثير الناس ودّه لو بس أمه عتيبيّة

تحياااااااااااتي

التوقيع

na111na@hotmail.com