[ولد مجنون]

جانا الكتاب أللي على الظلم مشبوك =متجمعلي فيه شلقت طراقي
فيه الكلام أللي على الهجس مسبوك=والكذب والبهتان والأختلاقي
سبق زعجت لهم هدايا سنبوك=وكسيتهم غير العمايم طواقي
وأغلبهم أللي صد والخشم مفروك=منهم هل العنه تمنوا فراقي
لكن من جنبه مجونن ومدلوك=ماينتهي لوزاد ضرب السناقي
سر ياقلم وأكتب كلامي على البوك =مادام باقي لخصمانا بواقي
ومادام طروق الهناديب مسلوك=ماني من يجبي نهار السباقي
وأن صار بالخندق جهازات وسلوك =مسكين من سلكه ضعيفا دقاقي
كلا معه تفكير ولسان وحنوك=لكن في وزن الكلام أفتراقي
أحدن كلامه لسعته كنها الشوك =ويغوص من بحر الخصيم العماقي
وأحد هذور وضامر اللاش مفكوك=تلقاه في لمت حروبه يخاقي
لاخصمن خصمه ومعناه مركوك=لرجم الشرف مهوب ويا المواقي
لون بلعومه عن الحكي متكوك=ينطق أبو طقه كثير النغاقي
أستر لبوطقه ليا صار ممسوك=أن كان له والي عن الأزلاقي
مادام أبو طقه ضعيف وهتروك=ربط السفيه أحسن من الأنطلاقي
ياالقطش نجسين المناقير دبروك=وحطوك بين الغار والأحتراقي
طاوعت في مسعاك مشرك ومشروك=راس سعد ويا ذيله عراقي
دودة وبا في شدقه صمغ وعلوك=وفي المنطقه تدبي بليا نطاقي
مر تجنس بالسماوه وكركوك=ومرن تجي بأطراف جو الملاقي
فيضة فيهامدانيع وبروك =وتشرب ليا ظميت غدير الطراقي
يطمع بها ويدشها كل صعلوك =لأن الحماية في ذرها أن فتاقي
وين أنت فازع ماتفرغت لبوك =لأنه رقيق الحال وأنته رقاقي
شاركت شنكار الولايش وحنوك= أهل الخلاعه والخناء والنفاقي
جريت ثوبك في الخباره وجروك=وعانقت صعبات الأمور أعتناقي
أنته مشك وفيك مجموعة أشكوك=وبعض الهقاوي بوهن كل هاقي
تبا تدارك مامضى وأنت مدروك=لازال في عنقك مجر الخناقي
وسمك على خدك من أللي تو لوك =من أبن رشيد الشمري والشلاقي
شمر وراك أسياد ومطير من دوك=الكل منهم له عليك أتفاقي
وقعت سعود الضغمي يوم خبروك=أيام يسرب خيلكم والنياقي
يومن فرسان السناعيس زاروك=وحصل لهن بين البيوت أصتفاقي
فرسان شمر يوم زاروك أذلوك=ذلت فضيحه جورها مايطاقي
تخيروا مالاق من عدة شبوك =وأقفو بها كد الغانيم تساقي
كبوك في صعب المواقف وسلقوك=واليوم أشوفك بالهناديب شاقي
وذميت قومن بالمعالي تعلوك=عن مستواهم في مداك أنطراقي
وعقب جلبك الضعف والخوف ساموك =وشروك من فوق الجياد السباقي
يوم الضياغم جالهم عندكم صوك =وتغانمت لابتك دمث المتاقي
حموك من صوك الضياغم وأفكوك=ودونك تجرعنا مرار المذاقي
وهذا جزانا ياأهل الفيس والدوك=يأهل النفوس المخزنات الضياقي
وتبا تماريني على شان دفوك=أللي لهم بالتايهات أنذلاقي
والفرق وضاح بين فايز ومرهوك =السيف يعرف والعراقي عراقي
أمجاد نجد لها حفيزات وبنوك =ماتنسرق ياثعلب الأنسراقي
أنا معي جملت شهادات وصكوك =عن أيامنا أللي مرمساتن أعتاقي
ولا أنت تذكر لك ملايين ولكوك=وين الوثايق ياكثير الشهاقي
ودك تفر من القفص وأنت مشبوك =شانيك من ماضيك شد الوثاقي
يوم القبايل بين عارك ومعروك=ورجم الشرف مابيت ثاوي وراقي
أنا رقيت وبيرق النصر مسموك =وأنته تكودك عاليات المراقي
وأنا ملكت أديار ولاأنت مملوك=حبلك ورا من لايرديد الطلاقي
لولا هل العوجا من الجور أجاروك= ألى اليوم وأنت متوبرن للشلاقي
ياالقطش وش هيضك والعرض مهوك=عليك من ماض الفراد متلاقي
غاربك من ذاربك مطلي محكوك=وبطنك من التخمه تعدى التراقي
وأن كان بن زكوى من الغيض مزنوك= قله ترى زبده دهجها الحثاقي
واد فحل قدامه الجسر مدكوك =خلى شغاياها تساقا السواقي
وضك المضيق عضيب وعضيب مضنوك=ليا عبر ساقي عثرله بساقي
وتحاشك مسعود والعبد مبروك =وهزوا خناجرهم بوسط الصفاقي
وكسوه بدلة ورك مسمومة أوروك =وشدوا على ساق العضب بالطماقي
القطش به خابور وعضيب دلموك =منت بنقي وعضيب مهوب ناقي
لعبكم من قال مشروك مبروك =حتى أتضح فيكم غميق الفلاقي
رمح الطريس بساسكم حط داكوك =مشته معه ساق الطريسي وساقي
وقبتكم أللي شلها عوف بسلوك =أللي قواعدها عيال العناقي
وخصمي ولوهاجم بتركي متروك =عن ماقفي يصعب عليه نفهاقي