ناصر الجلاه
ياحاكم الروقي تعال وحضر هجوس الضمير=لوكان كبدك فوق كبد الأرض قمت تحرها !!
بركتوا الناقه على الحزم الجلادي للبعير=(( يانفعةٍ تبغونها يغلب عليها ضرها )) !!
حاكم الغنامي
العزل ياناصر نهار الكون من حض الامير =وانا عزلت ام الحوار اللي يغذي درها
السن مارد السلات الشيخ عن فارس مطير =صغير سن بحربته.. كل القبيله سرها
ناصر الجلاه
يا أمير ياللي بغنا والعز ماترجع فقير=ما قدمك ألا قوم تعرف خيرها من شرها !!
الحر تعرف نظرته والبوم يعرف بالصفير=ياكبرها عيت تجي في برها في بحرها !!
حاكم الغنامي
اليا مشى واد الرشا ثم ناحره واد الجرير =بشّر عتابه بالربيع بدارها وديرّها
خذها نصيحه عن حياتك لاتلد ولاتنير=لاورتك بيض الثنايا يانويصر ورها!!:)
ناصر الجلاه
الله يعديكم خطرها دام موعدها قصير=ياربعنا اللي فالبسيطه مانخالف فأمرها !!
انا خبيرٍ في حياتي كيف تنصحك خبير=ياحويكم الله يصلحك لد العيون وقرها !!
حاكم الغنامي
زرّاعة البر الحمر ماتحصد حبوب الشعير =بكره تجي واذكرك ...تبغا سلف من برها
باقي لك ايام قلايل ثم تحاكم يالبشير !=سلم على السودان يمكنّك ماعاد تمرها
ناصر الجلاه
والله مادور وراهم لاقليل ولا كثير=أصحابنا اللي غرت الميقاف مدري غرها !!
أجل بوصلي رساله معك مادمت النذير=(( النار لاتصبح رماده كر ناره كرها )) !!!