[آبـوحربه]

السلام عليكم ورحمة الله وبركاته

أصافحكم بـهذه المتواضعه وأتمنى أن تـجد القبول

أنا وانت قصه عمر ياوادي العجمان = لنا من قديم الوقت زفره وتنهيده
يوم ان الليالي بعدتني عن الخلان = لقيتك وطن بالوصف ياصعب تحديده
أجي لك واهل الدمع واشكي من الحرمان = واخاطبك بالموال وانهيه واعيده
اعبر عن اللي وسط صدري من الأحزان =بعد ماطغى حزني علي وثنى قيده
وأنا كان قلت الصبر موتي من الكتمان= تعبت اتحمل والليالي بي ازهيده
عزاي الوحيد أن كل ماهو عليها فان = ولايجني ابن ادم سوى مازرع بيده
وأنا لو شكيت الحال لعبيد ابن سحمان = يبي يرتكي للي برى الحال ويبيده
رفيقن ليا بانت علي الشدايد بان= مواقيف حرٍ لاكفخ يدمي الصيده
لاكني نصيتك وانت وادي كما الوديان= تخايل بروق الوسم مع كل تعويده
وانا عيني اتخايل على ديرة الجدان= تبي شوفها لو انها عني ابعيده
عساها لمزنن ينهمل فوقها ودان=يبل الثرى والنبت تثمر عناقيده
تحول صحاريها بساتين ذات افنان= وطير السعد بالجو يصدح بتغريده
عليها من الرحمن بسم الله الرحمن=يديم الحيا والخير في نجد ويزيده
غلاها بقلبي من غلاء ربعي العضيان=عسى الحظ ينصفني وتصدق مواعيده
كذب من يقول اديارنا كلها سيان= لو ان الولاء واحد ونحيا بتجديده