اقتباس:
المشاركة الأصلية كتبت بواسطة علي فلاح العضياني
...
على الله نبذل الاسباب والله يكتب الارزاق = ولاندري عن الارزاق ربي وين يكتبها
بفضل الله ليا شان الزمن ماشانت الاخلاق = تعيش بنا المعزة مثل ماحنا نعيش بها
مفاتيح الفرج ماغير عند الواحد الخلاق = ملبي دعوة الداعين ومحقق مطالبها
وهذا اللي شرح صدرٍ من ظروف الزمن ماضاق = رجايه فالله اللي مرتجينه مايخيّبها
تشع الشمس وتزيح الظلام ويبدي الاشراق = ويشرق نورها من مشرق الدنيا لمغربها
ليا قفت مخيله ماتخيل عيوني البراق = لو أن ثعولها ينهل ماها من سحايبها
شريت الباقية بالفانية من غالي الاسواق = وروس اموالي بسوق الغلا ضامن مكاسبها
تحمّلنا الامانه و الامانه دين فالاعناق = ولايقبل عذر نفسٍ تقصر دون واجبها
ملايكة الحساب تسجل الاعمال فالاوراق = وفي يوم القيامة للملا ربٍ يحاسبها
وانا عاهدت ربي مانقضت العهد والميثاق = عهد .. والعروة الوثقى يديني في مقاضبها
عن الدرب العوج رجلي تجنب ماتحث الساق = لو أن أكثر عباد الله معه تشعب ركايبها
يقولون الرجال الصبر طعمه مر ماينذاق = واقول العاقل أموره يحسب في عواقبها
يدور بنا الفلك والجاهل بغيبوبته ما فاق = ونفسه مع طريق الغي متعبته ومتعبها
قليل الدين صدره ممتلي ضيق وحسد ونفاق = مع الخالق مخربها ومع خلقة مخربها
على الخايب فناجيل الدلال الصفر ماتنساق = تعدا للرجال اللي مكرمةٍ شواربها
رجالٍ للمراجل والعلوم الطيّبة عشاق = عزيزاتٍ مذاهبها .. عريباتٍ مناسبها
هل الطاعه توغل حبهم في داخل الاعماق = الاصحاب الكرام اللي ماتهفي قدر صاحبها
وتبقى حالة الدنيا اجتماع ومن بعده فراق = دروس ايامنا اللي علمتنا من تجاربها
ليا حان الوعد حل الوداع و جفّت الارياق= عسى ربي هذيك الساعه يهّون مصايبها
وصلى الله على اللي دلنا مكارم الأخلاق = عدد من حج بيت الله والكعبة يطوف بها
|
صح لسانك
يابوفلاح
كلام عين العقل
الله يعطيك العافيه
تحيتي وتقديري