[جمال العضياني]

المشاركة الأصلية كتبت بواسطة علي فلاح العضياني

...

على الله نبذل الاسباب والله يكتب الارزاق = ولاندري عن الارزاق ربي وين يكتبها
بفضل الله ليا شان الزمن ماشانت الاخلاق = تعيش بنا المعزة مثل ماحنا نعيش بها
مفاتيح الفرج ماغير عند الواحد الخلاق = ملبي دعوة الداعين ومحقق مطالبها
وهذا اللي شرح صدرٍ من ظروف الزمن ماضاق = رجايه فالله اللي مرتجينه مايخيّبها
تشع الشمس وتزيح الظلام ويبدي الاشراق = ويشرق نورها من مشرق الدنيا لمغربها
ليا قفت مخيله ماتخيل عيوني البراق = لو أن ثعولها ينهل ماها من سحايبها
شريت الباقية بالفانية من غالي الاسواق = وروس اموالي بسوق الغلا ضامن مكاسبها
الآمانه ثقيلة وحملوها الناس فالاعناق = ولايقبل عذر نفسٍ تقصر دون واجبها
ملايكة الحساب تسجل الاعمال فالاوراق = وفي يوم القيامة للملا ربٍ يحاسبها
وانا عاهدت ربي مانقضت العهد والميثاق = عهد .. والعروة الوثقى يديني في مقاضبها
عن الدرب العوج رجلي تجنب ماتحث الساق = لو أن أكثر عباد الله معه تشعب ركايبها
يقولون الرجال الصبر طعمه مر ماينذاق = واقول العاقل أموره يحسب في عواقبها
يدور بنا الفلك والجاهل بغيبوبته ما فاق = ونفسه مع طريق الغي متعبته ومتعبها
قليل الدين صدره ممتلي ضيق وحسد ونفاق = مع الخالق مخربها ومع خلقة مخربها
على الخايب فناجيل الدلال الصفر ماتنساق = تعدا للرجال اللي مكرمةٍ شواربها
رجالٍ للمراجل والعلوم الطيّبة عشاق = عزيزاتٍ مذاهبها .. عريباتٍ مناسبها
هل الطاعه توغل حبهم في داخل الاعماق = الاصحاب الكرام اللي ماتهفي قدر صاحبها
وتبقى حالة الدنيا اجتماع ومن بعده فراق = دروس ايامنا اللي علمتنا من تجاربها
ليا حان الوعد حل الوداع و يبست الارياق= عسى ربي هذيك الساعه يهّون مصايبها
وصلى الله على اللي دلنا مكارم الأخلاق = عدد من حج بيت الله والكعبة يطوف بها

الاخ \علي فلاح العضياني
صح لسانك وبيض الله وجهك على هاالشامخه التي اخذت شموخها من عزتك وسمو ذاتك

اخي علي لله درك على هاالابداع الغير مستغرب منك لاعدمناك

لك مني كل تقدير