سلطان الجـذع
مرحبا ترحيبةٍ مربوعه ومثنية = كل طرقيٍ لفانا واجبه قدامه !!
علموني عن حبيّب عقب مات العيه = ليت ما قلبه صدود عن الجمل وخطامه !!
مشاري الكرشمي
البقا بلي علومه كنها منقيه =الكريم اللي عن الزله يطول صيامه
العلوم اطوال مار الثابته مرثيه =واللوازم في نحاها ماتلين عظامه
سلطان الجـذع
انت ياهدد سبا اللي غبت لك حوليّه = ردك الله في جنوب الدار مدري شامه !!
والعوارف ماعطوك من السلب عاريّه = لين كفك وقّع المغرب براس ابهامه !!
مشاري الكرشمي
احتفظ بالثانيه واحسب علاها ميه=لين تدري بالسبب والعلم معي زمامه
الغناوي يعطي الحسنه ويدفع سيه=وانت معك جنيه مدري كم يصير اجرامه
سلطان الجـذع
رفعت الاقلام والصحف اصبحت مطوّية = وانت يركض بك جموحٍ مامسكت لجامه !!
ثابتة ومثبتة فالفترة الحاليه = لاتقول طويق يزمي مع جبال تهامه !!
مشاري الكرشمي
الذبيحه فالصحن نجضه ولاهي نيه=اعكس التيار لاتغديبك اللوامه
انت منت بخيل لكن بان فيك شويه=ليت ثوبك ماقصر طوله وطول اكمامه
سلطان الجـذع
الذبيحه نجضة ونار المكارم حيّه = ياكثر خوفي عليك تضيع فالدوامه !!
لا وفاء مثل الوفاء اللي لك تمد يدّيه = من يدسم شاربك لاتتهمه فأكرامه !!
مشاري الكرشمي
لو اوجه صاحبي قلت السلام تحيه=قبل يغديبه زمانه ثم تطول ايامه
يالجذع خل السجين يحس بالحريه=البلد بالشرع تضفي هيبته حكامه
سلطان الجـذع
يبدو انا ما لقانا للرعاه رعيّه = صاحبك هذا سلامه والسلام ختامه !!
خلنا لاهنت نأخذها بحسن النيّه = وعلم اللي فزعته تومي بروس اعلامه !!