[آلاد غنـــام]

يا الله في نوٍّ مـن الوسـم رعّـاد=تحيّا ربوع المملكـه عقـب نـوّه
يحيّي الفيافي .. عقب محصولها باد=العُود يابس .. والتـراب متشـوّه
لو ان مالي بوش من ضمن الاذواد=لكنّ لي مـع سجّـة البَـر خـوّه
ولاني بفلاح ٍ .. ولي بيـر وبـلاد=وليـا تـردى الجَـمّ تبغـا عبـوّه
لكنّ صبري طال يا شيـن مقعـاد=بَرَك علينا القيظ .. والوسـم تـوّه
والوقت بوّهني وانا بهّت يا زيـاد=وأشوف شيٍّ فـي زمانـي يبـوّه
اللاش فاد .. وطيّب الراس ما فاد=يجمـع ومخلِيـةٍ يديـه الـمـروّه
يندّ وجهه كل مـا جَـوه الاجـواد=أمّـا حَيـا .. ولاّ تسُوقـه حمـوّه
وغدا معَ الايام في حرب وجهـاد=ولا معْه في بعض المسايل جـروّه
وأزرى يوفّي حق نفسـه والاولاد=وحقـوق نـاس ٍ تلحقـه بالعنـوّه
يذكر ويَـدرى سالفـة كـل نقـاد=يخـاف مـن شمّـات والاّ معَـوّه
والاّ الردي يسبح على كبده الـزاد=وفي باقي الاحـوال مالـه طـروّه
لاهوب لا ناشـد ولا عنـه نشـاد=ودايم يلـوّذ عـن وجيـه السمـوّه
ماله هو اللي حَط له جـاه وشـداد=وعند المشفّح في الدرجْـة العلـوّه
وان زارهم تفرش له الأرض سجّاد=وهوّه من أوّل ما ضرى بالحفـوّه
ومن لا يحط المال في بـنّ وقنـاد=ويشـبّ دايـم للمناعيـر ضــوّه
وييسر على المعسر ويبني للامجاد=وينفع صديقـه قبـل ينفـع عـدوّه
هذاك قل له جعـل مالـه للأنفـاد=وعليه دعوه من عصـور النبـوّه
قلته وانا للـرزق مانـي بحسّـاد=ولا تُوخذ الأرزاق من بـاب قـوّه

للشاعر / مقحم بن دحيم الغنامي