ابو لمار
يامعجب اللي يغني كل ليل ونهار = ماكلّ او ملّ لو كل العرب تطلبه
باسه قوي ويتحمّل نار ولا دمار = والناس من خوف رب الناس ماتقربه
معجب العتيبي
وشلون ماتبتدي بالحق يابو لمار=معميك رب البشر والا القشر ترغبه
عليك باسي قوي ياللي عكست المسار=بعض العرب حظه ليا جربه ينكبه
ابو لمار
الحق اقوله في معجب سر ولا جهار = وامزح معه مير مزحي معه مايعجبه
يومين خليتني ياصاحبي في انتظار = اقول عني عميل الخير وش غيّبه
معجب العتيبي
البينه بينه والحر مثل الحرار=ماني بقايل خويي ول يامكذبه
العام خليتني ماقلتلك ويش صار=والظاهر افكارك من العام متكهربه
ابو لمار
ياصاحبي لاتحسب الهدم مثل العمار = صف النوايا وخلّ اعلومك امرتبه
اترك علوم الصغار اسمع علوم الكبار = وان كان يقطع ضماك البحر روح اشربه
معجب العتيبي
من يزرع الحنضله ماهوب جاني ثمار=والطرقه اللي بلا نيه ترا متعبه
يامسرع الروغه اللي طار منها الغبار=روغة قوي العزوم اللي رفع منكبه