صقر جعيد
سلام الله سلامٍ مثل ريح البن ويـا الهيـل = أعـده للرجـال اللـي يشرفنـي مقابلهـا
أنا لاضاق صدري بالهواجس مارقدت الليل = أفكر في كـلام النـاس والكلمـات أحللها
أبو بندر
ولا يامرحبا ترحيبة الديره ليـا جـا السيـل = من امزون العقارب يوم يروي الارض وابلها
عسى الله ما يكدر خاطرك يا الصاحب الحلحيل = تجاوز عن علوم النـاس والمولـى يعدلهـا
صقر جعيد
يدوم لك البقاء والبرق يبرق والرجال أتحيل = نبى ناصل ديارٍ ربـي الـرزاق واصلهـا
تقوله يابو بندر وأنت ماترضى علي الميل = عسى ربي يعدلهـا بعـد مافـلان ميلهـا
أبو بندر
انا خابرك ياصقر الجعيد اليا ركبت الخيل = الك هيبه وفرسان الخصم ما ظن تجهلها
تحيزم وستعد واصل المشوار فوق اشعيل = وقر( طاها وعمى)والمثانـي دوم رتلهـا
صقر جعيد
وأناخابرك ياراع الوفاء تعطي ولا أنت بخيل = دروبك فالمراجل ماش غيرك مـن يكملهـا
توكلنا على الله والعرب ماينقصـون الكيـل = ليا جات القسوم موزعة مـن عنـد كايلهـا
أبو بندر
انا خايف تكرر سالفة هابيل مـع قابيـل = ترا بعض القسوم ابليس يدخل في حبايلها
ابوشوشه عليه انكثر التكبيـر والتهليـل = قليل الخاتمه ما ريح النـاس ابمنازلهـا
صقر جعيد
وأنا خايف تكرر سالفة بابيـل ويـا الفيـل = ونبلش فالعـرب مابيـن عاقلهـا وجالهـا
بنادم خالقه ربي عجل ويمـوت فالتعجيـل = لاصارت خير نعجلها ولا صارت شر نجلها
أبو بندر
عسا ماباس وشبك منزعج يا راع وادي النيل = بغيت اقصر الـك السالفـه وتقـول طولهـا
الا يا فكرتي يا صحابنا فعيـال هـذا الجيـل = خطيره في تفاهمهـا خطيـره فـي تعاملهـا
صقر جعيد
تعبنا والتعب ماشوف له ياصاحبي تحصيل = بلاشي فالمزارع دام ماتطلـع محاصلهـا
ولا يافكرتي فاللي عيونه كنهـا الدربيـل = لكنه لانظـر يـم العـرب لازم يحولهـا
أبو بندر
ليا منا سلمنا من طلوع النجـم راع الذيـل = نبا نزرع دخن وعن الطيور الدار نقفلهـا
لاكن اخذ الحذر يا راعي الودنه علاك الميل = تراك اليا طفيت النار غيرك مـن يشعلهـا
صقر جعيد
أقول أن السماء مافيه غير الجدي ويا سهيل = ليا منك زرعت أزرع عنب وترك فلافلهـا
تبا تحصد ثمرها ياولـد وتحـط فالزنبيـل = وتبا تشتالها وليـا لحقـك الجـوع تأكلهـا
أبو بندر
عنب لاباس مار العيب فالتحميل والتنزيل = ياكثر اللـي يحملهـا ويعجـز ماينزلهـا
انا مما تشوف العين مسمع هرج قال وقيل = الي خطه مع العربان وعرف كيف اعاملها