علي فلاح العضياني
سلام الله سلامٍ يثبت التهمه على المتهوم = مدام إنّ الجذع ما أظهر دليله و اسر يا ساري
على وضعك كذا يعني لي إنّه فالعلوم علوم=و فالموضوع ما في يدك حيله واسر يا ساري
سلطان الجـذع
هلا يامرحبا ترحيبةٍ يصحى بها المنجوم = ويسري مثل مايسري الدليله .. واسر ياساري
ترى ماني بعجل أصب روس القوم فوق القوم = أحل المشكلة بأهون وسيلة .. واسر ياساري
علي فلاح العضياني
ليا هالحين يا سلطان في بحر الملام تعوم=أثر ما جاك في حقّك قليله واسر يا ساري
لا والله غير مثبوته عليك أنته و أخوك التوم=فضحتونا مع شيوخ القبيله و اسر يا ساري
سلطان الجـذع
صحيّبك مابغيت أنه يجرب سيفي الملحوم = واقول اني كسبت اجر وجميله .. واسر ياساري
اخوي التوم في هاك الدعاوي مايجيه اللوم = لمح له برق في عرض المخيلة .. واسر ياساري
علي فلاح العضياني
و الا يا الصاحب اللي طحت يا جعلك ما عاد تقوم=ترى اللي مثل حالك عزّتيله و اسر يا ساري
تقوله و انت قلبك ممتلي خوف و ندم و هموم=و لا فيكم بعد هذي عقيله و اسر يا ساري
سلطان الجـذع
انا مااطيح في ردع العدا عندي جهد وعزوم = ولكن الغشيم أخلي سبيله .. واسر ياساري
كبير الروم ماحدٍ جاه ينشد عن حوال الروم = هو اللي علّم بجنده وخيله .. واسر ياساري