Quote=أبونواف;819515]
هذه القصه وفيها قصائد متبادل بين ثلاثة شعراء
هذا عبيد بن ناصر بن عضيب من الجمالين من قبيلة سبيع العزيزه عند ماسمع أحد قصائد الشاعر الكبير غازي بن دخيل الله بن عون قال يالربع غازي بمدينة الخرمه وأنا في في مدينة الرياض وأم ملزوم أضيفه وأخاف أنه يموت ماواجهني والاأموت أنا قبل ماواجهه ولكن الله يحيكم القباله ترى عشاه عندي لوكان غايب وقام وذبح له ثلاث من الغنم وعزم اللي حواليه كلهم وحط (حمدان بن خرفاش المليحي )نائبا عن غازي بن عون القصه هذي عند ماسمعها الشاعر عايض بن محمد الحثري قال هذه القصيده
الشاعر/ عايض محمد الحثري
ياهاجس الشعر ماعانقت منضوحي =نفسي تهوم القرايح وأنت خاذلها
مهيب عادتك زرع الشوك لفروحي =عادتك لاحتجت فزعاتك تسبلها
واليوم عييت لاتنساق لشبوحي= عباة نومك من الشعر متجللها
ضيعتني عن جليل أفعال ممدوحي =أبيات الامداح لي شهرين أحايلها
ياهاجسي كم نخيتك مير ماتوحي =عاصي ولاللعصاه ألاتجاهلها
كان أنت عاصي نويت أعصاك بمدوحي =للي مكارم هل التكريم حاملها
اللي من كرم كرام سبيع مشيوحي = بالعم والخال علياه متحللها
من ساس ناسا مقاصر مجد وصروحي =عاشو أبها سالف الدنيا وماثلها
تاريخ الامجاد من بايح و مبيوحي =لبني عمر ذروة العليا مسجلها
ماقوموها بضحكت سن و مزوحي =الاكما قومت العيس بمحاملها
مدحي لو أقصاه وأستقصيه مبيوحي =عند أعرف الناس ما هو عند جاهلها
وان كان تسعى يأبو نايف لمصلوحي =مثايلي لاتعم الا مدهلها
وليا أسوتة كفتن الميزان برجوحي =أرسل جزيل الثناء والشكر بولها
تحية من خفى قلبي ومن روحي =لعبيد بن ناصر بن عضيب وصلها
راعي كباشا عليه السمن مسفوحي =تذبح لغازي ولوماجاه ياكلها
لوقالوا أخطا السبيعي قلت مسموحي =خطيئة مقديه فعلت لفاعلها
الشاعر الكبير/ عبد الله بن نايف عون وهذه مجاراته للقصيده
اليوم عني قناع الغيض مزيوحي =وبنات الافكار مرضيني تبهلها
ياخاطره بالخفايا الخاطره بوحي =لين أن يمناي تكتبها بأناملها
وليا أستوى كتبها ياخاطره روحي= وأخذي خفاياي عبر التيل أخف لها
روحي لعايض بمنضوحي ومسروحي =تحية عن كلام الزور كافلها
اللي نشأت مزنته في عالي الصوحي =زلزل رعدها وهل الغيث هاملها
هلت وعلت له ريضان وسفوحي= موتن شجرها لكن أحياه وابلها
قولي له أن العلاج الشاف لجروحي=في رايعاتن يجيني منه شاخلها
قولي له أني شهرت الصوت بوضوحي =في وسط قومن رفيعاتن منازلها
قومن له طيب الاذكار ممنوحي =معنا من أسلافنا طاري مراجلها
قومن لها المدح ولاالقدح مصفوحي = عنها ليا أتلاء وليد من سلايلها
عنيت من شان مصلوحه ومصلوحي =برسالة لين جيت عبيد شايلها
في مجلس فيه يلقى كل زحزوحي=قادات قومن نظيفاتن داخايلها
ثم قلت يامن لجل الحيل ذابوحي = هدية عايض أرسني ومرسلها
فيها عليك الثناء ياطايل الشوحي =وعلى الجمالين عممها بكاملها
وقد جاراهم الشاعر الكبير/ غازي بن دخيل الله بن عون بهذه القصيده
البارحه قدر صدري صارله فوحي =فوح المباهير من حامي ملايلها
أخيل برقن جنوب رماح له ضوحي =غرن أمزونه يشوقني تشاعلها
هيض هواء البال شوقن كان مذبوحي =وحياه برق المزون اللي يخايلها
وجريت صوتي لون الصوت مبحوحي=خود المشاكيل يكربني مغازلها
أنا وزرق الحمام اللي على الدوحي =نقراء عذاب القرايح ونتشايلها
أمثال ربعن يميحون الدلي موحي = وتجيب عذب المشارب من ثمايلها
عوب المعاني طرحهن كل طروحي =أخذوا دررها وشاموا عن مهازلها
وأنامنايه حصل لي عنه ساموحي =تقول الا عيان بالشبه مكحلها
والا المداوي مداويها بذرنوحي =حوز المغازيل مشغلني ومشغلها
وخليت باب الشبك للشرد مفتوحي =وأحيا أحاول أرضاها وتحايلها
والشكر لمنزل القرآن باللوحي =هون أصعاب المثايل لي وسهلها
ياعايض عبيد جوده عزب وسروحي =والناس وش فرقها لولا فعايلها
عبيد در الفضيله منه مصبوحي =وأم المكارم نهل من ماء مناهلها
وله لابة من سلايل سام أبن نوحي =من سالف العهد وافية مكايلها
يم المعالي لها هقوات وطموحي =وأسم الجمالين من كثرت جمايلها
وتراي من ضيفة ابن عضيب مفدوحي = ماقدر مجازات من فاز بنفايلها
أملي أن تحوز على رضاء الجميع والف شكر الاخ سلطان دحيم تم التعديل على الاخطاء اللي حصلت في القصائد وجل من لا يخطي أشكرك على ملاحظتك
[/quote]