النجــــم / ناصر الجلاه
يالشطيطي لاسلام ولاشبه ترحيبـه=غير نارٍ في جبينك قدحها بزنـادي
تدرق في الحصاني لين جتك مصيبه=والله أعلم يمكن إنك خلفهم تنقادي
زياد الشطيطي
ما انت بعتيبي ولاهي سلم عند عتيبه=يتركون الضيف لا دلـه ولا بـرادي
جيت فازع مار مجناك التعب والخيبه=ملحق القوم بعباته في هوا الحسادي
النجــــم / ناصر الجلاه
الكرامه للرجال أهـل الوفـا والهيبـه=والمياسم من نصيب اللي يحدر الوادي
كنت اقول إن الشطيطي كل علم يجيبه=واثرك اللي لاشراب ولاوركـم زادي
زياد الشطيطي
ماشرهنا الا على اللي ينعرف من طيبه=وانت مهما قلت قلنا يالعصيمي عـادي
طاح له في مشكله واثر السبب فصحيبه=ما انت لاقيلك طماعه مع بني عبـادي
النجــــم / ناصر الجلاه
والله إنك بعد هـاذي تمـرةٍ فالعيبـه=لوتصيحً في مطير أهل الوفا وتنـادي
روحت من دون شك ولاعليها ريبـه=المراصد فالفضاء وانته تحت مرصادي
زياد الشطيطي
انت مثل الغصن يومٍ الهوا يوميبه=مايبالك لاسلاح ولاتبون جهـادي
الردار اللي ركزته مانفع تعقيبـه=غادي ومن جابه وحطاه غـادي
النجــــم / ناصر الجلاه
الفراش أليا بغينا فالزمـن تعذيبـه=نشعل النار وسناها يجذبه سردادي
الرجل يوزن كلامه قبـل لاياتيبـه=ياجودي مالك محل ألا مع الاجوادي
زياد الشطيطي
كيف تشعل نار والوادي يصب شعيبه=والسماء من فوق راسك بارق ورعادي
ادري ان سنونك الله يصلحك تركيبـه=كيف تنطحنا ومشيك فالبلـد متحـادي
النجــــــم / ناصر الجلاه
ماعلمت الغيب ربي عالمٍ في غيبـه=عدكم مـورود وانـا جيتكـم ورادي
حطها في وسط بابك والهدف تصويبه=الحقيقه يالشطيطي .. ماتعز النـادي