هذه قصيده للشاعر سحمان بن ملحم السبيعي قالها مرثيه في صديقه العزيز عليه المرحوم باذن الله محمد بن حرباش المرشدي العتيبي
بدأ الصبح ياعفاس ماقمت لفراشي = على الكوع ليلي واتوجد على لاماه
رفيقٍ فراقه ولع النار في جاشي = سقا الله زمان اليا نصيت النسيم ألقاه
كبير الصحن سوٍ على جزل الادباشي= وسيع المعرفه لامن عمس البصيره تاه
طليق اليدين اليا غشا حلته غاشي = نظيف اليمين الله على عفته يجزاه
اعزيبه اصحابه من الطاش للطاشي = واعزيبه العين الحزينه على فرقاه
واعزي عتيبه كلها في ابن حرباشي = قضا الله قضاه وماقضاء ربنا نرضاه
وابا ابقى على وده مقيم وطراشي = وأقيف احتراماً كل ماعرضت طرياه
واسال الكريم اليا نشأ بأمره الناشي =يسوقه على قبر العتيبي وينثر ماه
واساله اليا حاش المخاليق حواشي =يعده من السبعه ويضفي عليه ارداه
لزم خوتن ماهيب هرج على ماشي =معزه وتقدير وقضيا لزوم وجاه
وهذه مجاراة الشاعر مطلق خالد الحويقل لللشاعر سحمان بن ملحم السبيعي
انا البارحه ويّا التفاكير بهواشي = سبايب كلامٍ هز قلبي وجاب أقصاه
وخلاني اسهر لين يبدن الاغباشي = وبانت نجوم الصبح والفجر حان نداه
وأنا كن ينهش ثومة القلب نهاشي =اساهر نجوم الليل يالايمي عساه
ينوشه من اسباب المقادير نواشي = ويبقأ سقيم والمرض في جميع اعضاه
أقوله ولا أسمع هرجة الخبل والواشي= وأفز لكلام الطيب اللي سهرت أقراه
كلام السبيعي حط بالراس وشواشي =وحرك مشاعر ضامري قافه ومعناه
بعد مانحشه من الصواديف نحاشي =وفارق صديق ليت كل الرجال حلاه
صداقة وفاء من قلب ابيض من الشاشي= بعد فارقه من زود حبه عجز ينساه
مشاعر محبه مابها غش غشاشي = لعله يدوم اللي هذا دايمٍ مسعاه
كلام ابن ملحم ريف من جاه هتاشي =كلام يترخ لاجل من عقبنا يلقاه
كلام يشابه للذهب عند نقاشي = بعد ماستوى يصعب على المشترين اشراه
بيوتن نوادر مابها هزل واخشاشي= نظمها نوادر والعزاء يمنا نصاه
يعزي عتيبه كلها في ابن حرباشي = وتوج كلامه بالنهايه بزين دعاه
وانا أقول هذا الفرق عن صحبة اللاشي= يابين التفاخت بين بعض البشر بيناه
بعضهم معرفتهم كما طاش ماطاشي =تجي تنتهي مانال منها الرفيق مناه
وبعضهم معرفتهم كما المبلغ الكاشي =ليامن زهمته في لزوم رفع يمناه
عسى سبيع ماتبكي على الحر عماشي =رفيق الرفيق ان ظامته بالقسأ دنياه
وعسى اللي رحل يلقاله ظلال وفراشي =بجنة عدن لامن كلٍ لقأ ملفاه