عبدالمجيد العطاوي
السعيدي سلّموه عتيبة الهيلا وساما=ولوّنوه بلونه اللّي عقب جهده يستحقّه
مار ما اشوفه يغنّي غار لاغنّا الحماما=واخوياه اللي على يمناه قصّوا نصّ حقّه
فواز السعيدي
بارك الله فالشّجيع وبارك الله فالكراما = يوم بعض الناس ماغير اسم يومي وسط رقّه !!
يالعطاوي مايصير انصيح والعالم نياما = كل ماتنوي تزور الجار دق الباب دقّه !!
عبدالمجيد العطاوي
ماعرف قدر الحشيم الاّ الرياجيل الحشاما=وانت عزّابي لكنّك ماسكنت بوسط شقّة
خابرينك يالهذيلي ماتلوم ولا تلاما=مار مثل اللّي رقع بشته وعوّد له وشقّه
فواز السعيدي
نص هرجك يالعطاوي لاحلال ولا حراما = لابغيت تحرّك المحماس يالغالي توقّه !!
انت شبيت الك نيره كلها برد وسلاما = مار لاتكفر وخلك مع هل الفقه وتفقّه !!
عبدالمجيد العطاوي
حدّ هرجي مثل حدّ السيف قصّاص العظاما=مار بابٍ صكّ عنك الشرّ لا تقعد تطقّه
احمد الله ماتفاخت سكّتي درب النظاما=البلا في اللّي ما يطعم زادنا الاّ عقب طقّة
فواز السعيدي
كان هرجك مثل حد السيف جعلك للرحاما = صرت مثل اللي يعرف الدرب بعد انك تبقّه !!
يالعطاوي كيف ابقهويك في جنح الظلاما = مار في جنح الظلام اللي تبا تبقّيه بقّه !!
عبدالمجيد العطاوي
لو نثوّرها ونصبح بأشهب الملح انتراما=والله انّك لو تمدّ اصبعك قدمك ما تحقّه
مانبالك في جناح الليل شرب ولا طعاما=انت رجلٍ ماتقهوى دلّتك غير المصقّه
فواز السعيدي
حظ ابو زيد الهلالي مالحق هجرة وباما = راح مرواح الشجيع ولافقد مايازن اقّه !!
كان تبغالك وسام امسح به دموع اليتاما = ثم حطه وسط حثلك ثم كل شوي مقّه !!
عبدالمجيد العطاوي
يوم باما كبر خشمه مايجي فوقه عراما=ماعرف فعل الهلالي ولا عرف جلّه ودقّه
ما كسب سبع النعايم كلّ من صلّى وصاما=وانت جايت لك على كيفك بلا جهد ومشقّة