سلطان الحافي
سلام يامعجب عجب عجيب في وقت اللزوم=سلام تسليمت وفا يامعجب انـت اوحيتهـا
قالو وقلنـا مايجـي فالنايفـات الا القـروم=والظاهر ان المرضعه اسقتك وانت اسقيتها
معجب العتيبي
يامرحبا ترحيبةٍ حسب العوايد والسلـوم=بأصحابنا اللي زادت الفرحه ليامن جيتها
ياصاحبي سلطان مايغنيك ترديد العلـوم=والمرضعه ياصاحبي ربتك وسط بويتها
سلطان الحافي
انا ادري بقلبك نظيف وشاعرٍ طبعك خدوم=لاكن غيـرك الزمـن لا جبتهـا وديتهـا
كاسن يداوي علتك كاسن يخلـك محمـوم=يابو يدييـن قاصـره معيـه ليـا مديتهـا
معجب العتيبي
الطايح اللي طاح ياسلطان مايقـدر يقـوم=وانته تبيها نور يارجـال ميـر اعميتهـا
ماينكر المعروف بين الناس ياكود الرخوم=ياللي تدورها مع اهل العرف ليش اخطيتها
سلطان الحافي
لوجيت ابا عاندك يامعجب ترى الوضع محسوم=شفني علاك ولو يجـي ميـه معـك مشيتهـا
انته تلكم من فراغ الهرش فـي خـده وسـوم=سنوك اللي في جمـاك اشـوف مـا حديتهـا
معجب العتيبي
لا بالله الا لاتعاندني وتذبحك الحلوم=انته علاك ثنين والزبده عليك ارخيتها
ترا النعم ياصاحبي لو طوّلت لا ماتدوم=احسب حساب الاوله والثانيه ياليتها
سلطان الحافي
حنا هنا وهناك يارجال فالموقف نجوم=ريح بدارك بندقـي تكفيـك ماثنيتهـا
الله خلقنا قسمنا جانا من خيار القسوم=وام الجدايل في ذرى سلطان ماذليتها
معجب العتيبي
ياصاحبي لاعودت بين العرب فرك الخشوم=نفسك تبا تتعب يابن حافـي ولا عنيتهـا
وختامها والنعم ياسلطان ماقلنـا الرخـوم=وام الجدايـل يالعتيبـي زيـن ماسميتهـا