العازمي
ياليل ياليل الهجاد اللي يسمونه هجاد = فالليله اللي من قشرها ماتطير طيورها
لو نار فواز السعيدي من على كنده وعاد = قرنين والهذلان محدٍ شاف غوش قدورها
فواز السعيدي
ياللي تنادي للعميل اللي يصيد ولايصاد = الليله انظر للعمانيه وازين كورها !!
يالعازمي لاياخذك فواز في غيرك سداد = حنا مقاديم الرجال اللي تحكم شورها !!
العازمي
الصيد في مخلاب الاشقر كل ماحان الهداد = اما يفجّلها النحر والاشلع حنجورها
ماخوذ والليله تباتوخذ بلاجيش وعتاد = من عزوةٍ يوم المواقف كسبكم من سورها
فواز السعيدي
يالعازمي لايمتعك جلدك على شوك الكتاد = اللحية اللي ماتقدرنا على طنقورها !!
انشهد انك يالعتيبي لاتقود ولا تقاد = حنا نعرف عتيبه الهيلا ونعرف دورها !!
العازمي
مقداركم ياصحابنا في قيض والافي براد = فوق الجبال اللي حصاها مايقل سبورها
شهادتك باقيلها ياصاحبي ختم اعتماد = منته من اللي كل ديره فالبلاد ايزورها
فواز السعيدي
اكيد مافيها كلام ولاجدال ولاعناد = مايعتلي شم الرواسي غير شقر صقورها !!
ولا العتيبي ياجماعة خير موذي للعباد = مايطمع الا فالذلول اللي تعب من جورها !!
العازمي
ويش انت خايف منه ماتنزل على اطراف البلاد = حتى بعد ساد الامن ميرادها وصدورها
حنا على جور الليالي من عياد وفي عياد = الله خلقنا للعدا مثل السهم فنحورها
فواز السعيدي
يالعازمي لازم تميز فالمسامه والشداد = راع الوطا ماننقده نفسه على مقدورها !!
انتم سياسيين وتحبون سوق الاقتصاد = تجار حتى فالليال اللي يشعشع نورها !!
العازمي
محوالنا يوم الفتايل ولعت حنا الزناد = واليوم ثبّتنا الشداد وجاك من ميسورها
منهاجنا للحرب والا للهوى علمٍ وكاد = يرخصلها الغالي مع ايام السنه وشهورها
فواز السعيدي
مافيك طمعه يالعتيبي (لاترود ولا تراد) = انته صروف الوقت فوقك منحني باكورها !!
حنا نحوش اعتيبه الهيلا مثل سرب الجراد = الحي منهم معتبر من ناس جوف قبورها !!