[الـكـرشـمـي]

قصيدة31

ما حلا المسيار والكيف في قصر ظليل=في محل يفتح النفس مسيار علاه
عند شخص في البشر ما لقينا له مثيل=في الأودام ماش مثله ولا شفنا حلاه
عينها عين اشقر بادي راس البتيل=ويتطلع للحباري يبا يطرح غداه
وأهني اللى ملكها وصار الها حليل=ما يبا غيره عطى يوم ربي قيد عطاه

-
-
قصيدة32

يا أهل المجمول يا اللى ترغمونه=خوفو الله كل نفس في هواها
ما تريد النفس غير اللى يبونه=كل نفس في الهوى تأخذ هواها
يأخذ المجمول شخص يرغبونه=تنظره بالعين قبل انه يراها
يوم لطف الروح كامله فنونه=ماتبي الا واحد في مستواها
مستواها عالي لا تظلمونه=والخطا والظلم لا يركب علاها
جعل كل البيض من فدوة عيونه=كلبوهن ما يسون عين علاها
وصفها صعب على اللى ياصفونه=من يوصف وصفها صعب احلاها
وصفها مثل القمر ما يلحقونه=والعذاري النجم والنور اغشاها
والبرد ينقال في مفرق سنونه=واعذاب اللى نظر وصف علاها
وعذاب القلب كاثرة شطونه=من وليف عذب العين وشقاها
ارحمو راع الهوى لا تقتلونه=ارحم اللى مات من سبة هواها
يالطيف الروح ليه تعذبونه=من رحم له مسلم يلقى جزاها
رحمة المسلم على المسلم معونه=والنفوس الها ولي مانساها
رحمة الله واسعه بأمره وعونه=كل شيء ابحكمته يمضي علاها
ويا الله اني طالب منك المعونه=والخطايا لا تحاسبني علاها

-
-
قصيدة33

نور بادي عسا كل البني من فداها=مثل نور اليا نور وبين شعاعه
الجدايل جميله والحلى في يداها=يوم يفصخ كموم الثوب يقتل ذراعه
عينها عين حر يوم أحلى احلاها=صيرمي اليا اهو فوق نزل وجاله
عودها عود ريحان على مستواها=ناعمة في حديق الصافي الماء متاعه
خدها بارق في مزنة هل ماءها=من نظرها من الزينات ينطل قناعه

-
-
قصيدة34

يا طير يا اللى ترفرف بالجناحيني=ردوا سلامي على راع النبا الغالي
لي مدة ما نظرت الزين بالعيني=أيام ما زرتها من كثر الاشغالي
أبو جديل على المتنين زافيني=والعين عين الوحش في المرقب العالي
ماهي بعبجه ولا وصف النحيفيني=مربوعه الجسم للعشاق قتالي
والخد يا بارق وسط الدكاكين=والعود موز اليا هب الهوى مالي
والموت رمش العيون مع الحجاجيني=واليا تبسم يفز القلب من حالي
علاه مبسم مثل صبر الرياليني=والبطن ملهوف وصفه كنه اهلالي
ماني بناسيه ألين الزين ناسيني=ما أنسى لطيف الحشي من بد الازوالي
واليا نساني نسيته لو سليني=حيث ان سلم الموده مالها تالي
سلم الموده تنوع بين نوعيني=حلو ومر ومنه الكبد تنزالي

-
-
قصيدة35

يغز قلبي اليا شفنا هو البالي=سبحان من صوره ماشفت له صوره
أبو جديل على المتنين ميالي=شقر تفرق على الارداف منثوره
عين الوحش وان بدى في المرقب العالي=والخد نور القمر اليا شع نوره
الها من الصيد حلياً بالخلا الخالي=ريميه قادت الغزلان في دوره
مشي الحمامه تخطى جسمها الغالي =وان قوله يا هلا بالخير مذكوره
مربوعة الجسم للعشاق قتالي=مربوعه تقهر العشاق مقهوره
مذخور شجيع ويحتمي التالي=يوم اللقا يقهر العدوان بنحوره
والحق تأمر علاهن دق واجلالي=وان قوله في العذاري ريس الشوره
مربوط مثل الوحش بقياد واحبالي=والله عطاها الجمال وزاد في نوره
ليته ولد عم ولا لي ولد خالي=يرتاح قلبي اليا سيرت أبا أزوره