قصيدة رثاء قال فيها رحمه الله21
هيض على الزمن واطرى على بالي= بعض المواقف تذكرني بماضيها
عساك يا ديرة سكن بها الغالي = يسقيك وبل السحاب السيل يسقيها
ماهي بدار سكنها جاس الانذالي= لكن من شان شخص ساكن فيها
أبو وصايف عليه الدمع همالي = لو جيت ابنساه اذكر يوم أناديها
لكن والله علام بأحوالي = ومعاوضه ربنا عنده وانا ارجيها
والصبر راعيه عنه الهم ينزالي= ومن لا صبر حكمة المولي مقضيها
صابر تحت حكمة الله ربنا العالي = علام ما في الضماير لو ابا اخفيها
ويا الله يالي عليم بكل الاحوالي = والحكم بيدك والارزاق تعطيها
تهب لنا صالح مثله على بالي= يوم ان ذكراه في قلبي مخليها
استر به في حياتي جوف الازوالي= يلطف بحالي وسمعاته معليها
ومن قام في طاعة الله منزله عالي= والمؤمن اللى صلاة الله مصليها
ومن ضعف حظه تردي لو معه مالي=ومن ضعف دينه لزوم النفس يرخيها
غلب علاه اللعين وصار تمثالي=بأسباب شلات سهرات طبع فيها
ومن تاب وجنب عن طريق ابليس ماخابي=والله لطيف بخلقه حاكم فيها
تفكى يا بندر تخلي درب الانذالي=والحر مجناه في عالي مباديها
وانا جنيتك من اللى يفرح البالي=ما هب خبل دروب الحق مخطيها
والرجل يمشي مع اللى يحتمي التالي=ولا الهزالا تخيب من يماشيها
تلقاه جوف الطيور البرق ويلالي= وعن المواجب يجنب ما يلاقيها
والرجل معروف خلق وطاعه الوالي=واحقوق والداه واجب ما يخليها
مع الكرم والشجاعه كامل الحالي= سكر على اللى هروجه مسرع فيها
والدرب معروف للاول وللتالي = والرجل يعرف دروبه حيث يمشيها
-
هذه القصيدة قيلت أيام الغزو العراقي على دولة الكويت22
صدام حيرت العروبة بمجراك=بشعب العراق اللى جعلته دمارا
هذا سبب فعلك وهاذي نواياك=دمرك لشعبك يوم مالك وقارا
هذا سبب غدرك وفعلك بيمناك=غزوك لجارك يوم أخذته جهارا
لبست ثوب العار والعار يغشاك=عقب عصيت منفذين القرارا
جاك السعودي ما يفكك نواياك=يمشي على وضح النقا في النهارا
بأمر الفهد ذخر الفهد ويتحداك=ذخر الفهود اللى تقص العمارا
شجعان نجد اللى تضدك وتاطاك=بمدفع وصاروخ يهد الجدارا
من طائرات الجو تقصف سراياك=وراحت جنودك من محلك فرارا
اللى شرد واللى طريح وينخاك=واللى خذيناهم بيدنا يسارا
واللى زبنا يوم دورات الافلاك=ادخيلنا لازم انادي بثارا
حنا حمات البيت من كل الاشراك=ودون الوطن نمشي اجموع انتبارا
لازم يقص الراس من حف علباك=يا المجرم اللى تختفي في الجحارا
وندمر البصره وتقمح ضراياك= واصحابك اللى وقعولك خسارا
ويرجع كويت العز غصب بلا ارضاك=ونحرره غصب بفعل اجهارا
وانسلمه جابر بعد ما طردناك=وتصبح ضعيف من احساب الفقارا
-
-
قصيدة23
يوم ان غازي نخانا نودر احزابه=يا الله دخيلك من الفشله وراعيها
بنولهم بنية مير الله اسفابه = يوم ان زرقون ريسها وقاضيها
يبون رفعه وقومه غلقوا بابه = والخطه اللى بنوها طابع فيها
لا يحسب الظلايم تتعلابه= الظلم هد البيوت اللى يبنيها
واللى سعى بالظلايم ما شقا نابه= والحق ملحوق والرايه مبديها
ما له دخل مير معه ابليس يسعابه=والحق خلاه والذمه مهفيها
واللى يساوي على الطالات فزنابه=وحق القبيله علا الطيب يساويها
ومن لا يذري ذراه ويمشي احسابه=ما هب كفو الامور ولا ملاقيها
وقت سريع اللسان يشيل مشعابه=يبا يحكم القبايل من يناحيها
الحكم لله وفيصلنا تعلابه= مذخور عبدالعزيز اللى مصفيها
وأهل العلا في جبال وفي حجا لابه=ماهي بفرض سهل تبا تعديها
ريع يا غلطان كل حقه أولابه=ومن ضاع له حق حاض الحق ينهيها
وحقك الازرق يهوش ويفتل اشنابه=ويقطع الروس وهو ما يلاقيها
يجمع الهرج كبر طويق واشعابه=ولا تصلح الديره اللى ساكن فيها
في مثل يوم العريض احنس والوابه=والبينه في يدينه مير مغطيها
ثم الحماميد شال البيت باطنابه=يطرد سبايب افعوله مفسد فيها
هذاك فعله وانا ما اخطيت في جابه=يارب لاتكتب اللى مخطي فيها
-
-
قصيدة24
ربعنا اللى كل يوم مشاويرهم تزيد=ما عينا للمشاوير برهان وحصيل
كل يوم مشغلين السعو يم المزيد=والهدف كله نبا الزين منسوع الجديل
كل يوم من رداعه اليا وضحاء بعيد=ماربح من صار حط الوساطه للبخيل
صادها اللى صامل مثل مفراس الحديد=والحديث مقدمه ما يهس عن الدليل
أبو فالح نظرته من قريب اليا بعيد=والفلوس مقدمه ما يبا مد الذليل
ساقها في واحد كنه الظبي الفريد=والمناسب جيده ما يبا غيره خليل
ما توحا في كلام المهبل والوعيد=مهتويته واهتواها ويضرب به مثيل
عزتي للى جداه الحكي والا الوديد=صامل الزندين يبدي اليا رأس البتيل
-
-
قصيدة25
أنا عندي نصيحه للشباب اللى لهم علوان=نصيحه للشباب اللى يعرف الزين والشيني
ترى عز الرجوله بالصلاة وطاعة الرحمان=وحسن الخلق مشهور وطاعة كل الاثنيني
وبعد هذا تحفظ حقوقك اللى تقضي الاشوان=وترفع لك مقامك عند الاقصى ثم الادنيني
وترى من ضاع حقه يضحك به القرم والديقان=ولا كسب مراجل غير حزن ويعمي العيني
وصحبان الرخا ما ينفعون ولا لهم سيسان=ولا ينفك غير اللى شجيع ويقضي الديني
نصيحة للشباب اللى يعرف الزود والنقصان=يعدي في الطويله في العلا ما ينزل الليني
ولا يتبع ضعيف مرتحله ابليس والشيطان=علاه من الولي لعنه يوم انه ضيع الديني
عسى الله ما يخيب شايب يتعب من الشيبان=يحط اله الولي مسند وعنه يخفف الديني
يحط اله الولي حر شجيع ويحتمي الاضعان=الياجو في المحل يشجع اللى جو لافيني
واختام القول صلى الله على محمد ذخر عدنان=عدد من حج بيت الله وصام وكمل الديني