[الامير حريبيش]

هذه القصيدة للشاعر عايض بن نوار بن متعب الجعيد - رحمه الله - بعنوان " الديره وأهلها 0

يا الله يا ربي عليك التدابير=طالبك روحي لا تكثر عناها
تغفر ليا كان العمل فيه تقصير=الروح ما تسلم بليا خطاها
قلته وأنا مبداي عالي شمنصير=في قنة عديت عالي شفاها
رديت من بالي كلام بتفسير=فسرت وجه القافيه من قفاها
كلام أحلى من حليب المصاغير=مربعه في نجد والصيف جاها
ترعى من البركة ليا عقلة النير=تشرب من الخبراء ليا الله سقاها
يا تل قلبي تل دلو على البير=أن حولت للماء جذبها رشاها
بير طويله وأغرفوها الحدادير=يقرع بها المغراف من قل ما ها
على ثمان كل هنه مغاتير=كما نجوم عاليه في سماها
في ما مضى ضلت ثمان مشاهير=واليوم راحت من زمان وطاها
يا دار من بعد الوجيه المسافير=دار نشور البدو ترعى حياها
ذكرتهم يوم أقبلوا بالمضاهير=يبون دار ما شكوا من حفاها
شدوا من الديره سواة الطوابير=راحوا وخلوا مرها مع حلاها
ربع تعرف الوارده والمصادير=تكرم اللافي لينه نصاها
يا دارنا وين الرجال المناعير=اللي ليا جا الضيق يذري ذراها
ذكرتهم في العيد يوم المحاضير=كل يجرد بندقه من خباها
راحوا مع الدنيا سواة المعاصير=تحت القبور اللي بعيد مداها
يا دار ما تنفع كثير المعاذير=ما دامت الدنيا على مستواها
يا الله من نو مزونه مصابير=يسقي لنا دار عشقنا هواها
يا طير ما تنفعك كثر العصافير=لو كان كثرت كثرها ما كفاها
اللاش ما ينفعك وقت المقادير=اليا طلبته حاجة ما قضاها
دائم بخيل ولا يحب المخاسير=وأن شبوا النيران ناره طفاها
يعطيك من كذبه مئات القناطير=واليا بدا في قالته ما حماها
هذاك لا عننز ولا سالم الزير=خابت به أمه خيب الله رجاها

وسلامتكم