ناصر المرشدي
تعال يامعجب اليا غاب مرزوق=واحسب حساب الاوله والاخيرة
لاتبدي اسرارك على كل مخلوق=ماكل مخلوقِ يحفظ السريره
معجب العتيبي
اهلا هلا بالصاحب اللي على ذوق=يبدا بداياته ولو هي خطيره
القلب ياناصر بالاسرار مغلوق=عاش بمسيره واستمر بمسيره
ناصر المرشدي
(الله من العيلات وانا ولد روق)=طاحت حبوبك فالرحى المستديره
لسانك المفتاح والصدر صندوق=والرجل يحفظ كلمته في ضميره
معجب العتيبي
يقولها ناصر وله قلب محروق=مدري زعل والا يباها ذخيره
يلعب ولد مرشد على كل طاروق=طالب وينصح ياعتابه مديره
ناصر المرشدي
لي كلمةِ تسمع ولي نضرةِ فوق=ويشيرني راع الوفاء واستشيره
خابرك ثقل وعقل مانته بمطفوق=وعندك مع الايام بصر وبصيره
معجب العتيبي
والنعم ياناصر من قلوب وحلوق=والصدق يامخلوق ماقلت غيره
التاجر اليا طب في داخل السوق=لاينتظر فالسوق بر وبريره
ناصر المرشدي
بعد نثرت السالفه حوقها حوق=ياللي تدير الرجل في كل ديره
ماعاد باقي فالمعاليق معلوق=يالله عسى فالامر خير ِ وخيره
معجب العتيبي
عزالله اني ما البس الثوب مشقوق=ولا مشيت دروب شكٍ وحيره
الظاهر ان صحيبنا جره الشوق=يم المشاكل والمشاكل تديره
ناصر المرشدي
انته عليك حقوق وحقوق وحقوق= طولتها والا من اول قصيرة
قضيتك فيها شويه من البوق=ماكن عندك يا ابيض الوجه غيره
معجب العتيبي
ماشوف يابن الناس ذالليله فروق=المجتمع واحد بشبه الجزيره
وانته بشر من طين يافلان مخلوق= اخر حياتك وسط حفره صغيره