بسم الله الرحمن الرحيم
والصلاة والسلام على اشرف الأنبياء والمرسيلن
اما بعد،،،،ارجوا من إدارة المنتدى والمشرفين الأعزاء عدم حذف القصيده أو إغلاق الموضوع
لأنني أظطرريت الى إنزال هذه القصيده بعد تصفحي لمنتديات حرب
ووجدت مالا يسر من تحريف ومهاترات الى درجة وصولهم الى الكلام البذيء فيما يخص شخص
شاعرنا كديميس ،،،، وبإمكانكم التأكد من ذلك بالرجوع الى منتديات حرب
هذه القصيده رداً على قصيدة \عبد العزيز بن حمود الحربي
يقول عبد العزيز
يوم كلن قام للثاني يكيل = يضحكون الناس وابليس مخدوم
رد كديميس :
يا قلم عزوز جاين له عويل =من كلامي ضايق الصدر امهموم
مايبات وفارقه حلو المقيل = والعيون الحول صابتها الهزوم
لا تضايق من كلامي ياابو ذيل =انت ضيفت امس واليوم معزوم
عند رجل ٍ مايخاف من القبيل = وكان هاجمته يبادلك الهجوم
ويطرح النيشان لاشد الفتيل =وبندقه ماهيب فاالهيه زموم
يتحكم فالرصاصه لا تعيل =وانسحابه صعب من بعد القدوم
وانت تركض من بتيل اليا بتيل = في بحر عمياك يا عزيز تعوم
وصرت للشيطان واعوانه وكيل = قلت انا بقوم وابليس مخدوم
مادريت انك جنحت عن السبيل =واستدارت بك دواليب الغشوم
وعادة الشيطان دايم يستميل =كل من مثلك عن الحق امغموم
ويش جابك للمشاكل يالهبيل =والسماء فوقك ملبد بالغيوم
السبر قوبعك من قفوا الشليل = والعقاب المفترس فوقك يحوم
اكتشف مافي الخريطه من حصيل = لو تضفضف ماتغطيك الهدوم
لا تماري قوم منت الهم عديل = ولا تخاصم وانت يااللاش امخصوم
قد سقوك من الذحاح الحنضليل = لين حالفتوا هل الجمع الجزوم
انظر التاريخ جيلن بعد جيل = ويتضح لك كيف توزيع القسوم
ويتضح لك مافعلنا يالهزيل = يوم جينا الدار والدار امحكوم
كم حدينا الضد بالحد الصقيل = وكم نزلنا بين قوم وبين قوم
وكم نهارن من سببنا صار ليل = من عجاج الخيل واوماي السهوم
مال نزهين الشوارب من يشيل =حذفهم فالمعركه حذف الجروم
ذا صويب وذا منيع وذا قتيل =وذاك ضاقت به معابير اليموم
لين زحنا راعي الروز الثقيل =وغادر الديره على قبا(ن) قحوم
حربنا خلت محمد يستقيل =يوم شاف اجموعنا دهمن دهوم
قبلنا لويت ذ راعه مستحيل =ويوم صافحناه سلمنا الختوم
ومشيخة نجد العريض المستطيل = سلم العتبان مشيخة العموم
وكان عاهدنا وفينا للعميل = وحربنا لأهل الحرايب حرب روم
للصديق انصير مثل السلسبيل = والعدوا اثقل عليه من الرجوم
وانت خابر يوم تختار البديل = يوم تنزع من قبيلتك وتشوم
يوم تطمر من فصيل اليا فصيل =جاز لك جانب متيهت الردوم
الرجال اللي يعزون النزيل = ومن يحاربهم يطيح ولا يقوم
حربهم خلت قبيلتكم تحيل = وشتتوا جمع السوالم والفروم
كان ديرتكم بوادن له مسيل =من الجريراليا المضيح للجثوم
مير حدوكم بشلفن فوق خيل = لين بانت في قبيلتك الثلوم
انهزم جمع السوالم مستزيل = ولايزال ابكم من الماضي عثوم
ياعزيز يابحر قولن وقيل = وين تبغى يالمزيني للنجوم
خلنا بالأرض والجيد يشيل = كان قربت الحمول من الصهوم
ويتضح ركض الأصيل من العصيل = وتدري انك من رديين العزوم
انتبه ياللي تحسب انك طويل = وانت ماتلحق ملاحيق القروم
انت كنت مع العرب عيبة مشيل = مير لا تقعد تهوم الحكي هوم
عيبتن فيها الجديد مع الحويل = ومن غزا وافلس رجع لأم الخصوم
وانخدعت بنعمة الدور الفضيل =واحتموك اهل المدافع بالطقوم
وقمت تعمل فالمراسيم اتعديل = ومن عما رايك تجاوزت الرسوم
كيف تذكر منطقة بيضاء نثيل =وانت من سعدون وعقاب مهزوم
جالكم قدام ابن وايل جفيل = وصفكم في دفتر الضبط امعلوم
عقب ماغرب يبي وادي النخيل = ردته كلمة مكبرة العلوم
كلمتن جرت خيالن مستخيل = ذبكم سيله على روس الحزوم
وكل مابيدينكم من شول شيل =ودهو للنياقكم توديه بوم
وين تبغى يم سلمى يالخبيل = وانت من فعل السناعيس امخزوم
شيخهم سقتوا له المال الجزيل = جزيتن توخذ عليكم للحدوم
وقد سرب قطعانكم وامره وبيل = وقد غشاكم من هل الطولات لوم
ويوم دقلات الأ صيله والاصيل = وشهرتك من فوقها عدة وسوم
واحدن لعبيد والبيت الدليل =والضياغم سيفهم دايم لطوم
واحدن للي سبقكم بالرحيل =وصار في الهيجاء يبيع ولايسوم
يوم حطيت المطيري لك زميل =واشتركتوا في الدفاع وفي الهجوم
جمعكم حجمه كبر هضبة حقيل = مير من صد الصناديد امحروم
يدحم كنه خيالن مستخيل =والثبات بساحة الحرب امعدوم
ومن يبهر دلته بالزنجبيل = قام معكم مير ماسد اللزوم
عقب زومه غادر الحسرج ذليل = يستغيث ويطلب الرب الرحوم
وقام يلعن حلف معبول العبيل =مع ولد باقان وعنان العزوم
انت تطلبني دليلن بتعجيل =وكان عندك عين برق بالرقوم
خذ كلامن مايزاد من الصميل =وان بغيت تقوم والا لا تقوم
وكل قاف بلادليل ولا كفيل =مايقوله كود رجالن خذوم
وكل رجلن مامعه في الحل حيل = لا يحط بعلبة الريحان ثوم
يعتزل ويصير في الظل الظليل =وش يبي بمكابدة لفح السموم
ولا وصلك من الكثير الا القليل = وخطنا ياصلك بالختم امختوم
آخر تعديل شلاش يوم 22-Nov-2008 في 08:13 PM.