جديده
ولها مناسبتها
اتمنى ان تقبلوها
كما هي
ياصاحبي طالبك لاترفع الصوت=دام العلاقه والصداقه حميمه
عاتبتني وعتابك اقوى من الموت=واحد من حد السيوف الصريمه
وظلمتني والظلم للحق تابوت=واقسى عذاب من الهموم الظليمه
وش مقصدك من هرجتن شتها شوت=يمي وأنا ما ارضى لنفسي هظيمه
ماتدري إن الكذب سايد ومفلوت=في عالمن فيه الصراحه جريمه
ولاتدري ان الزود فالهرج مكفوت=ولاعاد تاصلنا علومن سليمه
اهل النمايم تخطف العلم وتفوت=ولامنهم الي جايبنله غنيمه
كلن على رجم المتاهات منحوت=ولاعندهم مبدأ وقيمه وشيمه
لاشافوا الرجال ضايق ومكبوت=سوو على نقل الحكاوي وليمه
وإن جيتهم بالصدق مافاتك الفوت=كلن ليا شافك يذب الخريمه
لاشك نقل الحكي مايعمر بيوت=مير البلا وين العقول الفهيمه
راحت ضحيه بين هافي وهلفوت=واستسلمت وأرخت حبال العزيمه
حتى الصحيب الي له الطيب مكتوت=اصبح يدور في صحيبه نميمه
مدري حداه الوقت والوقت طاغوت=والا الصداقه في زمنا عقيمه
لكن دام الصوت ماهو بمخفوت=ماتنحنـي روس الرجال الحشيمه
لابد ياتي يوم والعالم سكوت=وتظهر معه كل العلوم القديمه
الكذب حبله كل ماطال مبتوت=والصدق يضهر والحقايق مقيمه
والرجل لن كانه للامجاد منعوت=ماههمه افكار العقول السقيمه
مادام فعله لاقسى الوقت مثبوت=تبطي متاهات الزمن ماتظيمه
اقولها والعلم ماهو بملفوت=وانا علومي كلها مستقيمه
ماني بلا ضايع ولاني بسربوت=حرن تعلى مع حرارن عديمه
آرد على هداج واهيجن الصوت=وأشوم عن بعض العلوم الوخيمه
ماهمي المرقد ولاهمي القوت=لو عشت في وسط البحور الطميمه
اكبر همومي لن بغى الناشد ثبوت=المرجله والطيب وشداد ريمه
وغاية طموحي مع هل الرنج والحوت=قولة(نعم) عند الرجال الكريمه
لكن طبع الوقت جاير وطاغوت=إن ماصفى زاد القسى والظليمه
شعر...ابراهيم الزراقي
آخر تعديل ابراهيم الزراقي يوم 17-Nov-2008 في 09:01 PM.