معجب العتيبي
بندر يكسّر حساباته وماله مثيل=من زود فرط الثقه مايمسك الحاسبه
وانا على شان تحسب ياجماعه جميل=جيته مع المرشدي ناصر واباعاقبه
بندر المرشدي
بندر يدقق حساباته وباعه طويل =ما يأخذ معادلة.. من عالمٍ راسبة
اعوير وصوير والله ما وراهم حصيل=واصوير ابا احطه الليلة على صاحبه
معجب العتيبي
ماناسبتك النتيجه قلت ادور بديل=وتعيد وتزيد فالموضوع ياكاتبه
تبغى الزياده تسجل ياعميلي سبيل=مشيتها للصديق اللي فتل شاربه
بندر المرشدي
ودك تمشي عليّه علم ماله دليل=والرّب ماينشب الا في شنب شاربه
سبيلك أعطه زميلك يستحق الزميل=وانا ترا غير ربي ماني بطالبه
معجب العتيبي
ياصاحبي لو عرضت ولو تحط وتشيل=بضاعة اللي يغش المسلم محاربه
شفها على الرف ماتشرا ولو بالقليل=الطيبه طيبه والخايبه خايبه
بندر الرشيدي
يأهل المعرفة ترا هرج الرجل مستحيل=وانا على قد عقله ما اقدر أخاطبه
عن سهم سابك هذاه الوقت جاز العميل=وسابك زعيم الصناعية.. سوقنا ناكبة
معجب العتيبي
لاتجحد البينه تبلش بيومٍ طويل=يومٍ به اطفال خلق الله تجي شايبه
مدام سابك ثقيل وصار دمه ثقيل=يبا يزوزيبه صحيبه على غاربه
بندر المرشدي
راجع ضميرك على ما قلت ربك وكيل=الظلم اله ياوسيع المعرفة عاقبة
مادام معجب على الفاضي يخضّ الصميل=وش لون ياهل الوجيه البيض ابا اعاتبه
معجب العتيبي
بعض العرب يوم شاف الحق جاله عويل=واصبح يراجع حساب الزور ويراقبه
خلاص مابه جدال ولا نبا قال قيل=وضفت بندر محامي عندي براتبه
بندر المرشدي
أحداك يم السنع.. كم قلت لك لا تعيل=غلطتك لو تعتذر بك ناشبه ناشبة
تراي زودت فالمكيال يلي تكيل=لكن روحوا بها... لو ماهي مناسبة