سعود العصيمي
سلام الله سلامٍ ينحزم له فوق ظهر بعير = على شأن العطاااوي عندنا غالي بدينابه.
تهرج يالعتيبي وانت ماانته فالعيون صغير= ودوّر دربها وليالقيته مابلشنابه
معجب العتيبي
هلا يامرحبا ترحيبة تبعد عن التقصير= ومثلك يالعصيمي لاحظر لازم يحيابه
والا ياسعود في عظم كبر ماينفع التجبير=كبر كسر العظم والوقت مدري ويش سوابه
سعود العصيمي
ياطيب اللي يفكر فالعلوم ويحسن التفكير = ماهوب اللي ليا ودى الخبر للناس ماجابه.
نبي نجبر كسير العظم والا انكسّره تكسير = ماهو لاقي مطاليبه قبل لايحسب احسابه
معجب العتيبي
ياطيب اللي حسب خطوات رجله قبل يبدا السير=ويدري عن دروب الضلع قبل يقوم يرقابه
هذاك يقربونه للعنايه وابرة التخدير=لعله ينتبه لافاق والشرهه على اقرابه
سعود العصيمي
يقدّر من يقدر والنشاما حقها التقدير = وحنا ياعتيبه كلنا للنار شبابه.
على هونك على هونك يامعجب لاتجيه مغير = يزول الغيم عن وجه السماء والعلم ترضابه
معجب العتيبي
يابو طايل ياطيب اللي معه تامين ضد الغير=لعله مايشيل الحمل في دربه ويشقابه
انا مابي ليا بانت حقايق يكثر التبرير=ابي نورٍ مثل نور القمر ياسعود يسرابه