فواز السعيدي
زار ابو زيد في وسط الجزيرة عرين = كل ما ياجد الغالي بدربه شراه
زار عزوة شبابه مثل حيد(ن) زبين = ضيفكم يا شبابه من يقدم قراه ..؟
معجب العتيبي
من قديم الليالي حكمة العارفين=من يقدم بنصف الكف ياخذ ملاه
فعلنا للضيوف ان قاله الله يبين=كل ضيفٍ وله قدره ويقلط علاه
فواز السعيدي
يبن الاجواد لاتنصب لضيفك كمين = لبسه مثل ما لبست ربعك عباه
وان طلبتو على اللي عندكم شاهدين = انشد العازمي وسعود مال الغناه
معجب العتيبي
ضيفنا له مكانه يالفطين الذهين=والهدف ياوسيع العرف بأعلا سماه
يالسعيدي لنا فالوقت جنبٍ متين=ومن نشد بين خلق الله لقا مبتغاه
فواز السعيدي
خلها وسط خرجك وادخرها سنين = مار لا تقعد بدربي سواة الصفاة
لقمة غليص يا معجب عجين وطحين = امل فنجالك اللي فالطرف ما كماه
معجب العتيبي
ما ادخرنا مع الايام غير الثمين=والله الوالي المعبود نطلب رضاه
لايطول ابك همك يالسعيدي سنين=هات نيتك كل انسان واللي نواه
فواز السعيدي
ادري انك على الميزان وزنك رزين = مار قيس الطريق الزين واحسب خطاه
لا تعاين بعين اهناك وتصر عين = قاضي العدل يرضي كل شكاي جاه
معجب العتيبي
حسب رسم الكروكي كل خطه تزين=والفكر ياعميلي عاليٍ مستواه
قاضي العدل حكمه فيه حكمه ودين=والله اللي على درب الحقايق هداه