[ابو ضيف الله]

المشاركة الأصلية كتبت بواسطة ابو فايح

حي الله ابو ضيف الله وابرك الحزات جلوسك على هالكرسي


س1/ موقف طريف واخر محرج حصل لك؟؟؟


س2/ انا قابلت ناس واجد موظفين مدنيين وعسكر واغلبهم يتمنى انه يعود الى مقاعد الدراسه ويتمنى ان تعود ايام المتوسطه والثانويه ؟؟؟ ما رايك هل انت مثلهم ؟؟؟ وان كانت الاجابه نعم لماذا ؟؟؟ وما اجمل الذكريات التي تحملها من الماضي وخصوصا ايام الثانويه؟؟؟

الله يبقيك يا ابو فايح والله يبارك فيك وانا اخوك

الموقف الطريف: المواقف كثيرة واذكر من مواقف ايام المراهقة اني كنت جالس مع اخوي الكبير وأسأله لو عندك سيارة ويش تسوي فيها انا بحط فيه وبحط فيه من الزينات والخرابيط (عقلية مراهق) ثم سألته طيب انت ويش بتحط فيها ؟ عاين فيني بطرف عينه وقال: لو عندي سيارة دعستك ابها ......

الموقف المحرج: البارح كنت في محل من المحلات وكنت طالب منهم غرض وقالو بيجي بعد سبعة شهور والسبعة راحت والعشرة راحت والسنة راحت ما جا طلبي وكل ما جيت عند اللي يشتغل في المحل (وهو سعودي) يقول ما جاني شيء انتظر وان شاء الله يصير خير والبارح وبعد اكثر من سنة جيتهم البارح ولقيت رجال ثاني غير اللي بالعادة وسألته عن الغرض وقال اصبر ادق على الفرع الثاني واثر الغرض موجود له 6 شهور عندهم انا زعلت وقلت للي قدامي انا بنصحك نصيحة ترى خويكم اللي بالعادة يشتغل هنا ترى نفسها شينه ... ويوم جيت ابا اكمل لالرجال يشر بيده لا تكمل ويشر بيده تراه هناك ويوم سكت إلا اسمع قرقعة في الغرفة اللي ورانا وشوي لهو طالع يعاين فيني بنظره قشرى ....



السؤال الثاني:
اكيد انه ما فيه انسان ما يحن لايام الصبا وخاصة الثانوية والمتوسطة وانا على راسهم والسبب لان هاك الايام كنت شباب تسوي االلي في راسك وما عليك من احد ولاحد عليه منك ولا عليك مسؤوليات مثلك اذا كبرت وتوظفت وفوق هذا كانت نظرتك للدنيا غير وتشوف الحياة بمنظر ثاني بس ليا منك طلعت من العش على قولتهم جربت الدنيا بحلوها ومرها عرفت العلم
واجمل ذكريات مرحلة الثانوية اني درست مرحلة ثالث ثانوي وثاني ثانوي في عفيف وكانت المدرسة كانها كشته من الوناسة اللي فيها المدير والمدرسين ما نندايهم غير ابو فلان وابو فلان والطلاب كان فيهم طنخة لا توجد في الدنيا كلها غير في عفيف وكنا اذا بغينا نغيب نغيب ونكشت ونتمشى بكل حرية خاصة ثاني ثانوي ويعلم الله اني رحمت الشباب يوم حطوا ثاني ثانوي في حساب المعدل حق الثانوية وقلت في نفسي حرموا الشباب من اجمل سنة في العمر

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة. قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة. اللهم أنصر من نصر الدين وأخذل من خذل الدين