[حمدان العصيمي]

أخواني وأعضاء زوار منتدى الهيلا السلام عليكم ورحمة الله وبركاته .

هذه قصيده في الشيخ / عبود العصيمي وفي إبله . لعلها تنال إعجابكم

.


]

يالله يامعبود ياصاحب الجود = يامبتدى الشكوى ويامنتهاها
نطلبك من خزاينك برق ورعود = في مزنةٍ غرّى حضنها سماها
وسميّةٍ من غبّها يخضر العود = براّقها يسبق رعدها وماها
تسقي الديار اللي نزلها هل الذود = حبّوا منازلها ونفحة هواها
يازين ممشاها ليا هبت النود = يجذبك خنّتها وريحة ثراها
تقول منثورٍ بها أزهار وورود = والاّ من الزل الايراني غطاها
نبى الوناسه مع مغاتير عبود = اللي ليا طوّح بصوته شعاها
تجي على صوته من البعد عرجود = ماردّها الراعي وجاء من وراها
وضح البكار اللي لها القلب مشدود = كدّس جهوده دونها واحتماها
حي الحجاج اللي لمن جاه مفرود = وحي اليمين اللي يدسّم عطاها
ماحط جواله على خط موجود = له فزعةٍ من شان وقته لقاها
ركنه حجا يذري وماضيه مشهود = راع البيوت اللي يذري ذراها
فيها الشحم والهيل والبن والعود =على المعزه والكرامه بناها
قلته وانا مالي من المال مقصود = أمدح رفيقي وافتخر واتباها
رفيقي الطيّب بالامداح معهود = تزهاه من بين الرجال وزهاها
هذي شهادة حق ماتبغي شهود = أطرف عتيبيٍّ يصدّق علاها

آخر تعديل حمدان العصيمي يوم 30-Oct-2008 في 12:42 PM.