علي فلاح العضياني
سلام الله تساليم الوفا يا ربعي الغالين=و صلناكم بعد طول المغيبه و اسر يا ساري
يا سلطان الجذع بشّر عسى حصّلت علمٍ زين=ترى ابن آدم يبا ياخذ نصيبه واسر يا ساري
سلطان الجـذع
هلا يامرحبا بالشاعر اللي غايبٍ شهرين =عن عتيبة وعن موقع عتيبة .. وأسر ياساري
بخيـر وفي رجاء خير وعسى باق العلوم تزين = حزمنا الكور في ظهر النجيبة .. وأسر ياساري
علي فلاح العضياني
عسى ربّي يا سلطان الجذع فوق الزمان يعين=يفرّق كل صاحب عن صحيبه واسر يا ساري
إذا ما انته بمستعجل يا سلطان إنتظر بعدين=زمانك يشكي ظروفه صعيبه واسر يا ساري
سلطان الجـذع
عداك اللوم من يوم انتهى عهد الشريف حسين = غريبة هذي الدنيا غريبة ..واسر ياساري
نبا نصبر لعله يصفي الما من بقايا الطين = نصيب الادمي لازم يصيبة .. واسر ياساري
علي فلاح العضياني
مصيبه لو تغيّر نظرتك فالسيف ابو حدّين=مصيبه يا الجذع واكبر مصيبه واسر يا ساري
هل التلميع مهما لمّعت وجه الزمان الشين=مع التدقيق له صوره غضيبه واسر يا ساري
سلطان الجـذع
اعرف السيف ابو حدين أعرفه ... قبل عام ألفين = متى خلص طليبٍِ من طليبة .. واسر ياساري
ليا جار الزمن الشين ماحنا قصار ايدين = قطعنا البحر عن عيش الغلبية .. واسر ياساري
علي فلاح العضياني
أدرّسك القرايه و الكتابه من قديم الحين=و ذلحينه حركاتك عجيبه واسر يا ساري
من ايريد يتعلّم يطلب التعليم لو فالصين=و أنا لي نظرةٍ ماهي قريبه واسر يا ساري
سلطان الجـذع
تعلمنا من الدنيا .. وقبلك نوفي الوافين = لكنك ود علم وعلم جيبه .. وأسر ياساري
أجل جهّز ركابك والوعد في ثالث العيدين = جبل ورقان سّند مع شعيبة .. واسر ياساري
علي فلاح العضياني
ترى كل العرب يا صاحبي عن سيرتك دارين=مريضٍ حصّل علاجه طبيبه واسر يا ساري
يزين الوضع لا صار الخبر محصور بين اثنين=عسى المذهب يعقل الله ذهيبه واسر يا ساري
سلطان الجذع
أفّرح خاطرك فالسبت وابكيك فالاثنين = يالين أشرفت في راس الرقيبة .. واسر ياساري
يابن ثعلي للا لطم الخشم ماسال دمع العين = ترى حاضر زمانك بان غيبه .. واسر ياساري
علي فلاح العضياني
ليا منّك عكست الخطّ قلنا وين رايح وين=صراحه فيك شك و فيك ريبه واسر يا ساري
يقولون العرب ذكر الحيا و الطيبين يبين=سق البل و انطح الارض العشيبه واسر يا ساري