هذه قصيدة للشاعر زيد الهجير الثعلي بعد ان زار منازل العوازم بعد رحيلهم ورأى المنازل التي كان يزورهم فيها خالية موحشة وهاضت قريحته بهذه القصيدة:
امس الضحى عديت في راس قنة=في قنة باد بعالي سبورها
بين الطراة وبين ضلع مسمى = نعام ضلع نايف فوق قورها
واخذت فيها قيس مجلاس ساعة = وآخذ واعبر في الليالي وجورها
والينها تجور وتدور بالعرب = لو ضحكت لك عام عجل دبورها
عجلة على عشاقها بانقلابها=تعطي النذارة قبل وقع معبورها
ما احد صفت له قدمنا من عباده=دنيا قريب يسرها من عسورها
ولها رحى دارت على صفوة الملى=الله يكافيناا سبايب شرورها
رميت دربيلي يمنها وشامها =وشفت العجايب واعجبتني زهورها
ارض عذا في القيض حلو برادها=عسى الحيا الجرَار يسقي دهورها
ديرة رجال المجد والعز والثنى =هل الشجاعة يوم كشة ستورها
حامينها وهم ذراها وسترها=وحجابها يوم الجواهل ودورها
من دونها بسلاحهم تلطم العدا=وتشبع سباع المجحرة في جحورها
افعالهم ما تنحصي دون دارهم =يسمع بها اللي ما حضر في جرورها
آلاد عاصي يا جبر عطبة الشظى =ليا حولت عقبانها مع صقورها
اهل المتاريس يشهد الله بفعلهم =يا قامت الهيجاء ودلت وزورها
هم ربعنا بالخص من دون غيرهم=يوم انهم في الدار ياكثر نورها
والله ما نرضى بجار بدالهم=ما دامت الدنيا على قرن ثورها
اليوم منهم خاليات ركونها=عاين منازلهم تحاوم نسورها
شدوا ولافي دبرة الرب حيلة=يوم اجزلوا عنها تعلوا ظهورها
راحوا كما نو تقافت سحايبة=ليا هبت العليا وقامت تكورها
آلاد عاصي عز من يعتزي بهم =ليا حام حايمها وفارت قدورها
وأمسيت والله ما تبي النوم عيني =كن الحميس مذوب في حجورها
قلت آه يالعين الشقية علامك =قالت بلاي الكبد كثرت حرورها
انا ما الوم العين لو سال دمعها=تبكي بعبرات تزايد عبورها
تبكي بدمع محفي اطراف خدها=حتى ايش لو انه كثر ما يعورها
قلت اصبري ياعين والصبر طيب =ما يحتمل زلاتها ألا صبورها
انا ورى ما ابكي وتبكي ضمايري =على حرار حولت من وكورها
ضلت منازلهم ورانا ودونها=تلطم سبور القوم عنا سبورها
مشاعل بالليل يمشى بضاحهم=هم اسود الدار وهم نمورها
الطيب مقسمهم من اول جدودهم=والله اللي يعلم خفايا سرورها
رجالهم كل اللوازم يسدها =يشفيك لو جالت وطالت دهورها
حمولة ياويها من حمولة=في كل درب وافيات شبورها
نعمٍ بهم غصب على الغيض والرضَى=يوم الفتن وابليس مفتاح سورها
لطامة العايل وحماية الوطن=زحازيح يوم الغيض يملى صدورها
ليا ناحرت نار المعادي لنارهم=ضياغم روس النشامى نقورها
مثل الجمال اللي تضارس لحيها=كم واحد حطوا بعينه ذرورها
كم شيخ قوم من طرفهم منيته=خلِي عشا لسباعها مع طيورها
عاين منازلهم وعاين زرابهم=فيها ليا وقت البعث مع نشورها
ياما كفوا فيها من الدم الحمر =صر مضى يوم الاعادي تزورها
في الصبح نواس على ذاري الخلى =وبالليل تسهر في المجالس نجورها
تشهد لهم السكين والقدر والصحن =والجار عقب الضيف يشبع بسورها
للجار والضيفان عطف جنابهم=واهل الصخَى باللوح تكتب اجورها
ما قلت فيهم كذب والشاهد الله=جابة صدوق ماتقطع عقورها
والقصيدة اطول من ذلك بكثير هذا اللي انا سمعته من كبار السن اتمنى ان تحوز على رضاكم