معجب العتيبي
المرشدي ناصر مشى متحادي=يالربع من يقدر يروح يرده
البارحه لصدورهن عدادي=واليوم نص ورودهن ماعده
ناصر المرشدي
ترفع يدينك للعرب وتنادي=وانته على ماقيل جنب القدة
ماني بغادي وانت قبلي غادي =من كبرها حطيت لك مسودة
معجب العتيبي
لو السوالف حرب والا جهادي=قدام ناصر ماوقف مرتده
ويوم انتخينا قال انا فالنادي=خربانتن من يوم راح لجده
ناصر المرشدي
جاب الفتيله عند خشم زنادي=ووده يطفيها ولاهو وده
والوضع عادي بس ماهو عادي=يبيّن الفتحه ويخف الشده
معجب العتيبي
الظاهر ان حسابها لاعادي=شوّش على ناصر وزاده كده
يبغى يجملها مع الاجوادي=لكن فتح عينه وغطا خده
ناصر المرشدي
بالضبط جاكم مانقص مازادي=يافكرتي وش لون كيف ترده
قال المثل لاشفت ضالم بادي=دينه ردي على المصلى حده
معجب العتيبي
الظاهر انك حادرنٍ لك وادي=وتقول معجب جابها من جِده
صحيبنا في هالحياه عنادي=مايمشي الا بالعصى والشده
ناصر المرشدي
بغيت احول فالمحيط الهادي=وبلشت في جزر المحيط ومده
خلاص ياسرداد يامردادي=لاقلت ود العلم يعني وده
معجب العتيبي
حاولت لكن صار صعب المادي=لاتبدي فالدرب منت بقده
قصتك تنشر فالصحف والرادي=راجع حلولك لاتزيد المده
ناصر المرشدي
احذر من المنقود والنقادي=واحسب حسابك فالرخى والشده
ماعنك ياطير السعد نشادي=يقولها اللي قالها من جده